حبة صور … للشاعرة إسلام العيسوى
مابقاش باقيلي منه غير
حبة صور
عايشة أشكي ليهم
م الفراق
و إزاي قدر يبعد
و سابني في اشتياق
عايشة باقلب في الصور
طول النهار
و في ليلي باجري
و أستخبى في حضنها
م الذكريات
أحكيلها إنه خلاص نسيني
و طيفه ساكن جوه عيني
أيديه بتحضن و تواسيني
وداني سمعاه بيناديني
و عينيه في عيني
و مجافيني
و أيديا ساكتة مسلمة
منتظرة ليه لحظة لقى
يشبه لقانا بتاع زمان
لما أيديه تحضن في أيدي
متبتة وقت السلام
و يضمني في حضنه بحنان يرويلي عطش الاشتياق
و لسانه ينطق بالكلام
يهمس في ودني بهمهمة
أخبارك أيه وحشتيني
أنا قلبي عايش بالحنين
سابني لمين
قلبي حزين
بالكدب بافرح
و أخبي عيني الدبلانين
أنا عاملة جامدة
و قلبي مكسور م الانين
و أما اتقابلنا بدون ميعاد
بعد البعاد
وسط الزحام
وقت السلام
غمض عينيه عن رؤيتي
و كأني مش موجودة أبداً
في المكان
خلص الكلام
و مشافش شوقي
اللي في عيوني
و قت انتظاري ل السلام
و سؤالي بتخبيه جفوني
لا يبان عليا الإنهزام
ماوحشتكش
إزاي كده
إزاي يكون
مش حاسس بيا كل ده
إزاي اعيشله
و أكون أنا كبش الفدا
معقول كده
معقول قدر
يمحي في يومين
أثر ايدين متشعلقة
في ايديه كطفلة
في قلبها بذرة لحب منبتة
إزاي كده
ينسي الدفى
و أنا باستخبى بين ضلوعه
في حضنه من برد الشتا
و اتحامى فيه من اي نظرة تكون كده و الا كده
معقول قدر
معقول قدر ينسى الدموع
و هي نازلة بالخضوع
تترجى فيه
يفضل حاميني
يفضل حبيبي
اللي الزمن طبطب عليا
و سابه بوسه فوق جبيني
كان وقتها لما أتوجع
خدني في حضنه بيواسيني
بإيديه بيمسح دمع عيني
و كأني طفلة صغيرة
بيضحك عليا و يراضيني
حسيت للحظة إنه الفراق
ضميته جامد بإشتياق
و كأن كان القلب حاسس
بالوداع
و بإنه كان أخر لقى
إزاي بقى
من بعد كل الحب ده
غاب عن عيوني
زود ظنوني
و سابني اعيش متفرقة
متقطعة
و متقسمة
زي الدبيحة بينهشوني
و النوم خلاص فارق جفوني
مابقيتش حاسة غير جنوني
قلبي و روحي بيسألوني
إزاي قدر
ازاي قدر يتخطى وجعي كل ده
إزاي كده
إزاي بقى راضي
بذل قلبي ليه كده
إزاي كده
معقول أكون
ماوحشتهوش في البعد ده
أنا كنت عايشة الباقي بيه
أنا عايشة ليه
و في بعدي عاش
و سابني أموت
و أبقى لحياته أنا الفدا
إزاي كده
