دور جواك … الشاعر هاني النجار
دور جواك على ناس تانيين
على صنف جديد غير الباقيين
ناس تحزن لما تشوف حزنك
ناس تتعب لما تسيب حضنك
ناس تبقي في عز الهم معاك
دور جواك
انسى الخاينين سيبك منهم
اوعاك على سرك تأمنهم
ياما قلبك داق الويل منهم
دا ليالي الفكر عذاب و هلاك
دور جواك
على حد يصون العيش و الملح
على حد يكون وياك في الجرح
في غيابك عنه يصون ودك
مايكنش مع الدنيا يهدك
و يعيش لك و يكون لك سندك
ع الحلوة و ع المرة معاك
دورجواك
ياما عيشت سنين مع ناس خاينين
ولا نابك غير دمع عينيك
دور جواك على ناس تانيين
م النوع اللي يخافوا عليك
ماتعيش ضحية و تتألم
الصورة اهي واضحة بتتكلم
ركز مع نفسك و اتعلم
الخاين عمره ما يبقى ملاك
دور جواك
دور جواك و ابدأ تاني
الدنيا ماهيش واقفه عليهم
هتقابل أشكال و أسامي
حرص على نفسك وسطيهم
فوق و اتعامل؟
بدل أوضاعك بالكامل
اعمل تغيير و يكون شامل
و افتكر اللي حصل لك كله
و بلاها تفكر ف اللي اذاك
دور جواك
