جناية مشروعة
للشاعرة هانية جمال
ده تملي عيونه محوطاني
مطرح ما بروح رايحة معايا
وكإن مفيش حواليه تاني..
و بالنسباله وجودى كفاية
انا وحدى ف قلبه وف عيونه
واحساسه بيطلع و يخونه..
مهما يدارى هواه و جنونه
بيبانوا في فرحته بلقايا
و بفرح اكتر منه وادارى
علشان جوايا الشوق سارى
وماليش الحق اني اجارى
إحساسي وأبينله هوايا
وعيونا بتفضحنا ده عادى
فبأخر دايما في معادى
علشان يبقي التعبير هادى
بسلامي يادوب من ضحكايا
والحضن ده ابسط تعابيرى
وانى اضحك. فده كتر خيرى
مبسوطة وقلبي صبح طيرى
مرفرف حواليه ومش جوايا
