ندمانه

الشاعر  / محمود يحيي

أنا ليه مش عارفه أكون واضحه وياك وخلاص

إيه اللي مانعني أقولهالك ..

معقول ده كلام ينفع فيه كسوف

العِشره لابد تكون مبنيه على المعروف

ويا تقبلني .. وأقبل أنا بيك

يانشوف حالنا ..

الخوف أحيانا بيموِّت وساعات بيبدل أحوالنا

وإذا كان مكتوب لينا نفارق

يبقى الأفضل نختار دلوقت ..

مش لازم نضحك على روحنا

وجراح

ووداع

ونضيّع وقت ..

إحنا كبرنا على دور بايخ وعتاب كداب

لو كان ينفع تاني أسامحك

كنت سامحتك

وبدون أسباب

إنما صدقني المره دي

أنا زعلى ماهوش أبدا منك ..

أنا زعلانه من نفسي عشان إديتك أكبر من حجمك

ورضيت بالعيشه معاك خايفه

على حب زمان

طبعا ندمانه إني آمنتك

حبيتك

ورسمت ملامحك

ووهبتك عمري بدون داعي ..

خبيت عنك ظني وشكي

وانت بتحلالك أوجاعي ..

وتقول للناس عني حكايه

وانك مهما هتبعد عني .. أنا هاستناك

أنا آسفه إتأخرت ف ردي

مش عايزه أكمل عمري معاك