ليلة بعمري ,, ايمان العطيفى همسات جنوبيه
بعد صلاة العشا بشويه
لما دخلت الأوضة لقيته
شاغل نفسة بالتعويذة
عمال يقرا،ويقرا،ويقرا
لما لمحنى..هب هيمشي!!!
فاجأة صرخت وقولت إستنى
دأنا طول عمري بحلم أشوفك
أو أتكلم بس لطيفك
ليلة واحدة إهديها لقلبي
ليلة واحدة معاك فى الجنة.
بص عليا بصة حيره
قال:شيفاني؟
قلت له :أيوه
قال :عارفاني ؟
– أيوه..أيوه !!!
من ” بطوط” ل “ميكي” ل ” بان”
سحرك مالى الكون ألوان
وأنا عشقاك من قبل مافتح
ورد خدود عمري بزمان
قالى: ليه بس اتاخرتي؟
أنا مفضلش معاي غير ليلة!!
قلت: كفاية،هى الليله عليا شويه
ليلة أكمل بيها حياتي
ليلة بكل العمر بحاله
ليلة هنية.
حط عرايسة كلها،كلها،فوق الفرشة
قالى:إختاري مين هتكوني؟؟
– “إيلا” و”بيلا”؟
– تؤتؤتؤ
-والا “سنو”
– تؤتؤتؤ
– طاب ” جودزيلا”
– تؤتؤتؤ
-تبقى “أبرل” ملكة كل بحورالدنيا ؟
قلت له: لأ ولا واحدة فى دول!
قالى:إيه حلمك يابهية حيرتيني؟
ياللى عشانك سبت العالم كله ورايا
أنا مش صدفة فى قلب الغرفة
أنا كان لي معاكي حكايه
كنت بجيكي وأنا متخفي
كنت أسقيكي الميه بكفي
كنت أمسحلك دمع عيونك
واقول عمري فدا لدموعك
بس يارب العمر يكفي
أنا شُبيك ..لُبيك وياكي
ليلة معاكي
أقيد قنديلك
وأفرشلك سجادتي الحمرا
لما تخطي الدنيا تجيلك
خضت بحور الدنيا وجيتلك
عشمان بس أشرب من نيلك
بس إختاري،الوقت بيجري
أنا مفضلش معاي غير ليله
حط عنيه فعنيا أسرني
حسيت سحر فى جسمي سكني
قلت له: وأنا وياك مش عايزة
غير بس أبقى
تنة
و
رنة
ايمان العطيفى همسات جنوبيه
