إتنين قدام … للشاعر عبد الرحمن مصيلحي

 إتنين قدام … للشاعر عبد الرحمن مصيلحي

كان قاعد لابس سماعته

ومشغل فيلم

وبيحسب في مسافة وقته

وعينيه بتنام

لم السواق م الناس

أجرة واحد واحد

وصاحبنا دفعله اوام اجره

لاتنين قدام

وكإنه بيهرب م العالم

بمسافة شبر وجوز جنيهات

الشنطة علي كتافة تملي

بتخلق مسافات

وبراح يقدر يستوعب فيه

كم آلامه لو كان موجوع

يقدر بمسافة اغنية

يخلق موضوع

ف يجيب ويودي مع خياله

ويضحك ف السر

ويفسر أحلامه ويبكي

من غير ما يبوح

وبيشرب قهوة كمان سادة

ليل ويا نهار

بيداري حياته ف جيب سري

دايما مفتوح

والعمر بيجري اوام منه

ف وسط المشاوير

كام واحد ف الدنيا لوحده

والناس حواليه

كام واحد بيفرط روحه

ع الناس ببلاش

كام واحد حب ينول فرحه

وقام مد ايديه

مالاقاش غير حزن بيملا عينيه

ف بيربط عينه بحته قماش

علشان ما يبانش الحزن عليه

ف ما تسألنيش ازاي بجنيه

اقدر اختار لي صديق وطريق واغاني وفيلم يونسني

وحاجات م الممكن تسعدني

ما بقيتش بشوفها ولو احلام

لم السواق م الناس أجرة واحد واحد

وانا كنت بحاسب علي أجرة اتنين قدام