ليه سيده تركب 2 جهاز لولب عشان تمنع الحمل ؟؟
متابعة د شيماء عراقي
د. محمد جعفر أحمد يسرد واقعة لمرضية وحالة صعبة
قصه دراميه حقيقيه مش بتتكرر كتير ، مريضة في الخمسينات بتشتكى من دم مع البول مستمر لسنوات وحرقان في البول والم اسفل البطن.
في رحله طلبها للتشخيص و العلاج مرت بدكاترة كتير لكن لم يوفقوا في تشخيص
بعد زيارتها لطبيب جراحه الكلي و المسالك قام بسماع التاريخ المرضي منها بدقة و خلاها تحكي كل تفاصيل مرضها و أي عمليات او تدخلات تمت ليها قبل كدا وجد أنها مركبة لولب من فترة طويلة جدا و لما عملت سونار عشان النزيف البولي دا قالولها انتي مش مركبه لولب اصلا و هي أكدت انها مركبه و الاشعه التلفزيونيه مكانش ظاهر فيه اي حاجه بالفعل ومحدش عارفة فين ايوة زى ما سمعت كدة محدش عارفة فين وراحت لطبيبه نسا تاني ركبت لها لولب تانى من غير ما تعرف الاول فين وبكدة في لولبين المفروض !!
وفضلت عايشة بالاتنين فترة طويلة جدا وبتشكى ومحدش عارف سبب المشكلة اية
●قيمنا المريضه و وضعنا قدامنا كل الأسباب المحتمله للنزيف البولي في السيدات و علي رأسهم طبعا فين مكان اللولب التاني ؟ عملنا اشعة مقطعية للمريضة ودى تانى درس مهم للاطباء الشباب خد تاريخ مرضى بدقة كل كلمه مهمه و متستبعدتش أي كلمه تتقال و أي تشخيص محتمل واطلب فحوصات متاخدش الامر بسطحية ..
●لقينا اية.
– اللولب الاول نصة في الرحم ومخترق جدار المثانة ومكون علية حصوات اللولب التانى داخل الرحم…وفي بعض الحصوات في قناة مجرى البول …
بعد عرضها على استشارى المسالك وضعنا خطة مشتركة للعملية ويعلم اللة مدى تعقيد وصعوبة الحالة في إتخاذ القرار و العمليه نفسها لكن إستعنا بالله
– شلنا الحصوات المثانة الاول بالمنظار
– ثم فتحنا ووصلنا للرحم والمثانة..
– تم فصلهم عن بعض بعد مجهود شاق جدا وشلنا اللولب الاول
– وقفلنا جدار الرحم وجدار المثانة..
– فتحتنا الجدار الامامى للرحم لرفع اللولب الاخر و طبعا منفعش نشيل اللولب التانى مهبلى نظرا لان المريضه عاملة عملية استئصال لعنق الرحم ومقفول تماما الرحم
الحمد للة المريضة خرجت من المستشفي بصحة جيدة
تمت الجراحه بواسطه
د.امير فايق
استشارى جراحه و مناظير الكلي و المسالك البولية وفريق العمل المساعد
