معجزة ايتن الموجي … تستعيد ذكريات مؤلمة
بقلم بهاء_حجازي
القصة قديمة شوية من سنة 2008 .. أيتن الموجي إعلامية وبنت الفنان الكبير ناجح الموجي… نقلت لبيت جديد في الشيخ زايد واترقت في شغلها فحست ان الدنيا بتراضيها وانها بتعيش اسعد أيام حياتها…
هي منفصلة عن جوزها.. فجوزها قالها انا هاخد العيال علشان يعيدوا معايا… وهي اتصلت بامها تيجي تعيد معاها.. يوم 29 رمضان.. دخلت تنام.. ع أساس تصحي الساعة 6 الصبح تيجي عربية الشغل تاخدها… لكن هي مصحيتش غير بعد 4 أيام.. صحيت مش عارفة حاجة.. وبتحسس تلمس عينها.. مقلتش عيونها في مكانهم.. لقت عينيها في خدودها…
ايتن نامت من هنا وفجأة دخل غفير اسمه عبد المتعال من اسوان… كان مزنوق وعايز يجيب هدوم العيد فطلع يسرقها مذيعة بقي وكد، طيب هيسرق مثلا… ويمشي قالك لا.. انا هضربها بحيث اسرق على رواقة.. راح مسك حديدة ونزل ضرب في وشها 12 ضربة… فكل عظم وشها اتكسر .. لدرجة انها شبه ماتت اكلينيكيا 4 أيام بعدها.
عملت بعديها ايتن 12 عملية معقدة جدا.. وصلت تكلفة العمليات لـ 600 الف جنيه.. ودا سنة 2008 رقم فلكي.. يكفي اقولك ان ابويا كان موظف بقاله 30 سنة وبيقبض 900 جنيه ساعتها.. وخدوا عظم من منطقة الصدر عشان يزرعوا عضم في الوش.. وأثناء العمليات.. عضلة القلب اتوقفت عن العمل.
أيتن بنت نجاح الموجي.. اشتغلت مذيعة من سنة 1995، وعملت كذا برنامج.. منهم برنامج “مع أيتن” واشتغلت في قناة الساعة..
بتحكي أيتن أنها كانت ناقلة البيت جديد وحي الشيخ زايد كان تقريبا حي الحلم… هادي ومساحات واسعة وخضار وبراح .. فبتقول اتصلت بامي قالتلها تعالي باتي معايا عشان نتسحر سوا ومباتش لوحدي لان زي ما قلتلك العيال راحوا لابوهم.. فعلا امها جات البيت واتسحروا وطلعت حضرت حلقة بكرا.. بصت للسقف وقالت اي دا يا رب.. ترقية في شغلي .. والبيت الحلو دا.. اكونش دخلت الجنة.. ضحكت وظبطت المنبة ونامت.. بس بتقول معرفش اي حاجة غير اني صحيت بعد 4 ايام.. مش عارفة اي حاجة.. بعدها بحط ايدي عشان افتح عيني مش لاقياها مكانها… لقيت عيني في خدي.
بتقول ان من ستر ربنا ان طليقها كلمها ياخد العيال يقضوا اجازة العيد معاه في اسكندرية… لان مين عارف كان ممكن يعمل فيهم ايه.. خصوصا ان عيالها متعودين يناموا جنبها..
أيتن قالت أن الدكاترة قالوا لامها لو عاشت هتتعمي لان حصل تهتك كامل في الشبكية، وهتعيش طول عمرها مشوهة.. وكل الاطباء قالوا ان اللي حصل معاها معجزة.
القاتل للاسف شاب من اسوان عنده 25 سنة بس .. والمحكمة محكمة حكمت عليه بـ 10 سنين سجن… واغلب الظن انه خرج من السجن… لان المدة عدت بكتير..
الغريب ان ايتن خدت الضربات ودخلت في غيبوبة.. مصرختش.. وهو سرق ومشي.. ومحدش شافه أصلا.. فجات الشرطة حققت وشكت في العمال اللي حوالين المكان.. وقبضت عليهم.. وهناك باتوا في القسم.. والساعة 3 الفجر.. صحي عبد المتعال من النوم وهو بيقول انا عايز اعترف ان اللي ضربت المذيعة..
طبعا اتحددت جلسة محاكمة بعد سنة.. وايتن صممت انها تزور الراجل في السجن.. علشان تسأله ليه.. انا عملتلك ايه.. وقالت انها كانت بتنزلهم اكل في رمضان.. بس المحامي بتاعها قالها بلاش تقابليه دا مش كويس علشانك.. واصرت تروح المحكمة.. علشان تبص في عينه وتسأله ليه.. لكنه كانت كل ما تبص عليه ينزل عينه في الأرض..
