الليل كفيف … شاعر الغلابة سامح هريدي
الليل كفيف
لكنه شاف
البرد مش قد الغطا
فاحن قلبه
ع اللي شايلين همهم
و خاف لا ينهش لحمهم
فابعت لهم
الشمس ملفوفه في لحاف
علشان تطمن قلبهم
مستنظرين الحظ يوم يضحك لهم
و يرادُ لليل الجِميل
الليل طويل أوي عندهم
أطول من السَبع العِجاف
بيغمسوها بصبر حاف
الحمل منقوش ع الكتاف
و الوش مطبوع بالشقى
و الإيد شوارع
تمشي فيها الذكريات
و الذكريات
مليانه دايما بالوجع
الليل ساعات بيكون جدع
و سنين كتير
بيكون قليل الأصل فى بيوت الفقير
الحلم مِتعَرش حَصير
ف المطره تنزل تقتله
الحزن مين حايبدله
و الجرح إيه حايدبله
و الهم مين يستحمله
غير القلوب الدايبه فيه
الليل برئ
من كل تهمه إتوجهت أصلاً إليه
ف بلاش نلوم
أو يوم نجيب العيب عليه
و تعالوا نسأل نفسنا ؟
هو احنا ليه على بعضنا
قلوبنا أقوي من الحجر ؟
القسوة ليه داء إنتشر ؟
الرحمة ماتت و الضمير
مبقاش بينئح ع البشر
الليل كفيف
لكن حاسيس
أما احنا بنشوف إنما
عمي البصيرة و البصر
