ابيض و اسود … الشاعر محمد علي
و أنا لسه بحسب باقي عندي قد أيه
من الشعر الأسود
و الهموم شيلالي أيه ف منابي بكره
و الباب ده اصلاً نمره كام
أوصله زحف مالقاش فيه اوكره
يغلبني دايماً كل يوم فكري العنيد
مليون سؤال رخمين اوي
زي الناموس
مابيهمدوش
واكلين دماغي كل يوم
مابيشبعوش
و مفيش سبيل أوصل لفجر معاه إجابة
مين إللي غشش للسما حيرتي و آهاتي
ساكت و رغم البرد ده
محتار أوي
مين إللي سرب للسحاب كتمة عياطي
الإجابة مش هتفرق
لسه شايف روحي قايمه و سايبه جسمي
وسط غيط التوهه ببقى خيال مأته
واحدة واحدة بيجي طير ينهش ف حلمي
و أنا مش ضعيف بالعكس لأ
أنا باقدر أمشي تاته تاته
رغم عجزي في السبق
بعرف أنظم نفسي لما السكه تطول
و استلف من حلمي طاقه للي جاي
و اكتسب من غلطي غلطي ف إللي راح
بس الخيول فضلوعي بادئين السبق
مع كل سحبه و نفخه في سيجاره زهق
بافضل أرتب ف الورق
و باقول ده ينفع أو ده لأ
ملعون أبوها الوحده و الخوف و القلق
سبتيني ليه و أنا كنت بمشي ليكي زق
العين بصيره و كنتي شايفه الوضع أيه
كان حيلتي أيه غير قلبي و شويه كلام
الشعر و السُكر الحلال
مجزوب بتمتم إسمك المسدول حنان
و باقول يا ناس
الحب لأ
و إياكوا حوا تسكن العقل التقيل
هتخففه
الحب لأ
قلبك هيتسلسل مشاعر خوف
و ضعف هتكتفه
أنا ياما كنت و كنت لكن
الصبح أصبح لونه داكن
دلوقتي شارد ف الأماكن
و إنتي عني كتير بعيده
زي طير فارق مكانه
وضاع ف أحضان السما
زيي أنا
تايه ما بين كل الحاجات الممكنه
مجنون و جراني القصيده
معرفش هكتب عنك أيه
معرفش بكتب ليكي ليه
معرفش غير معرفش لكن
حاجه واحدة مش مفيدة
كل مرة تزاحمي فيها الفكر جوه
تتولد بين السواد
شعره بيضة تكون جديدة
