عاهة مستديمة … الشاعرة وفاء علي
عملتي قلبك ملطشة
سيبتيه سبيل
كل إللي من شهدك أخد ترياق نجي
و فضلتي وحدك ف السكك
متبعترة و قلبك قتيل
داسوا عليكي بحملهم
كسروا الضلوع
كل إللي فارق م البداية
ماكانش ناوي ع الرجوع
و إنتي إللي من حزنك
غرقتي وسط دوامة دموع
قلبك قنوع
راضي بقليله في الهوى
ولا عمره كان م الحاسدين
رغم إن بابه بدون حرس
مافيش لا قفل ولا جرس
صابه العمى و صابه الخرس
مكتوب عليه يفضل سجين
الحب أصبح ليكي عاهة مستديمة
ما إنتي إللي أفكارك مبادئك
مش سليمة
فشلتي إنك تآخدي حق
ف صبحتي ل قلوبهم وليمة
رقَّعتي ليه في خلايا دمك
و رفضتي ليها تجددي
مع إنها دايبة و قديمة
آن الأوان إنك تثوري و ترفضي
قلبك يكون ساحة نزال
الحرب دايما تنتهي ب خراب
مافيش فيها إحتمال
ياتكوني م الأول قوية و تبعدي
أو تخسري قلبك و تستني المُحال
