أنا عاشق
الشاعر محمود محمد
يتوه طِيفي في ملكوتك
و يسبح في سماكي سنين
يشوف عَرشِك كما الهدهد
و ناس تُسجد و ناس هايميين
على الصَّفين بيستنوا
و يتمنوا..
تجُودِي بعَطفِك الحاني على قلوبهم
تشاوري بصولجان عشقِك فتختاري
أمير الحب من بينهم
و أنا خايف.. يكون الاختيار غيري
و مين غيري يكون سليمان؟
و لسه طيفي كالهدهد بيستنىٰ
شروقِك وسط هذا الجَمع
و شايل قلبه فى رسالة و مطوية
بيحلم إنه يرميها ما بين إيدِك
فتقريها..
و تلقي إنه بسم الحب…. كان اسمِك
و جوا القلب كان رسمِك
و صورتِك نقش عالجدران
و سيرتِك بحر.. و فيها راح أكون غرقان
و فجأة بتشرقي كالشمس
تنور سكة العاشقين
تقيدي شموع خطاويهم
فيتلاقوا..
و يبقى الحب دُنياهم و جنتهم
يخَلِّد في كتاب الخلق قِصتهم
و أنا بتحين الفرصة للقياكي
و مستني أكون شطك و مرساكي
تحُطِّي بقلبك الدافي على شطي
و تحتلي
جميعي بنظرة من عينِك
أكون جُندِك و أصير جيشِك
أدافع عن حصون حبي لمملكتك
و ما أرفع راياتي البيضا
غير لما تفارقيني… و إياكي تفارقيني
عشان ساعة فراقِك دي
هاكون ميت
مانا عايش بأنفاسِك… و زادي هو إحساسِك
يا ستي راح أقولها خلاص..
لقلبك أيوة أنا عاشق
