آخر حاجة … الشاعر حمدي موسى
وأول شئ
متتهانشى و متبانشي لأى عيون
و ظل عزيز
و مهما يكون
متقعدشى مع واحد عديم الأصل
جدره مداقش حلو الطين
متعرفلوش لا لون و لا جين
و لا تبقي فى يوم واقف علي صفين
و لا تقول الكلام يمشى مع احتمالين
و لا تطعن عدو ف الضهر
و انت مهاجر الجهلة
هتبقي هجرتك سهلة
اذا هاجرت عز الضهر
تانى حاجة
متخافشى مادام تمن الحقيقة معاك
و لو ميت ألف جريوا وراك
و لا يهمك
فى جيبك دعوتين أمك
و بؤجة نور
و لا تنزلش بير مهجور
و لا تعجن ف أى ماجور
و إذا حسيت بريحة ظلم فز و ثور
و خدها قاعدة من واحد شرب ضلمة
من الزنزانة لما اشتر بعد الشر
منتاش عبد للمأمور
و تالت حاجة
سيب عينك براحتها
اذا عِشْقِت بكا تبكي
وإذا فرحت
متستغربش ضحكتها
و عوِّدها تشوف لبعيد
و حوِّدها إذا غلطت فى سِكتها
و سَكتها هيجى العيد
ورح تفرج
و بكرة كلمتك تخرج و تتفسح
وترجع بالمعانى ف كيس
و يجى وراها ألف عريس
و رابع حاجة
إتأنَّى…..و فكر تانى و استنى….
و هات العالي ف الواطى
و غيَّر مونة البنا
و فكر تانى من ناحية أمل تانى
و هات كلمة تليق ع الحب….. تتغنى
و روح لبعيييد بأحلامك
و سيب القلب يتمنى
كدا هتموت… كدا هتموت
خلاص ابقي أطلب الجنة
و خامس حاجة
سيب نفسك متحبسهاش
سنين عمرك.. متحسبهاش
و إذا اضطريت تحب الدنيا
حب لكن متعشقهاش
و عديها عشان تيجى إللي بعديها
و إذا حسيت بفيروس شعر….
بوس الكلمة و اعديها….
و لو عاوز تموت إنسان….
عندك روحى موت فيها
و آخر حاجة
أرضك…… مش حدود حكام
و عرضك … دمعة العاجز
و نظرة من عيون أيتام…..
و حلمك تلتقي أيام
تزيح الساتر الحاجز
و كل ما كان فؤادك خام
هتطلع من عينيك آية
و يطرح من خلال الصبر ضحكاية
و دى حكاية إذا عرفناها بالتفصيل
هنقدر نكتشف تماثيل
و نسترجع عرايس النيل
و أيها حية مفيهاش روح
هترجع تانى لعصايا
دى آخر حاجة اقولها لك
و آخر حاجة ويايا
و بس خلاص
