قصيدة وحشاني …. للشاعر محمد البيطار
برغم إنك بعيد عنى
و رغم ان إنتى وحشانى
قساوتك خلت الشكوى
تموت زيك على لسانى
و رغم انى بتوه جداً
فى عين الناس
بشوف ف عينيكِ عنوانى
و أقول هوصل لبر أمان
تعاندينى
ف أتوه تانى
و ليل البعد فيه جبروت
عديم الصوت
و حكم أكيد علي
قلبي البرئ بالموت
و رغم ده كله حبيتك
و سميتك
و تين القلب و لقيتك
طريق التوبة و الغفران
و بعد سنين من التوهان
لقيت السكة فى جبينك
تغني لى
“بعيد عنك حياتى عذاب”
و انا شاعر كتير كداب
بيوصف انه تاه منك
و انه ارتاح بعيد عنك
و يرجع تانى ينده لك
يشاور بالوداع بالزيف
و يعمل نفسه واد حريف
و قاسي و ناسي و أنانى
و لو قلبه الضعيف ينطق
هيفتكرك و ينسانى
و يعدم كل أشعاره
و يكتب إنتى وحشانى
