حاسب … للشاعر : صابر عبد الوهاب
حاسب من اللي حسبتله
وكنت اخره واوله
كل الحنين بنبدله
وشوقنا بيودي لبعيد
حاسب على قلبك بقى
ده العشق حبل المشنقة
لفيته في ليالي الشتا
فاكره الدفا
طلعت من عشقك شهيد
مش قولتلك
ثبت خطاوي المعشقة
مش قولتلك افهم ياعم انت بقى
مش قولتلك سنين هواك دي مقلقة
فادك بأية عند العنيد
رميت هواك في قلوب بشر
ملهاش امان بالمختصر
كل اللي في الحب انتصر
خد الف طعنة من جديد
كان ايه اللي جابك ناحيته
لا طريقك ولا كات سكته
خد كل فرحك موته
اخدت ايه منه البعيد
