200 نظرة….. للشاعرة رباب الجورية
يامعاند قلبي ودقاته
وطالبني فى بيت قلبك طاعة
وصفولي عيونك كمهديء
وقالولي 200نظرة فى ساعة
وانا قبل مابوصل للتالتة
بغرق وبدوب فيك ببراعة
اه يابخت الكتف الل بإيدك
بتطُب عليه
ويابخت القلب الل بحورك
بتنادي عليه
ياملاك وملامحه بتسرقني
فيها من الجنة كتير حكايات
كل اما ابصلها مابشبعش
وكأن الجوع موصوف فى عينيك
منقوش روايات
..
انا كام صنارة بتشبكني
اهرب من رمشك فالاقيني
متشبّك مني فى ضحكاية
ضحكتها ملامحك.. ويّايا
من يومها بلف الكون كله
وانا واقف جنبك فى مكاني
…
…
كوكب فى عيونك ومجرة
وانا قلبي قصادهم نجمه خفيف
خايف يتعرى ب اشواقه
فتشوفه قصادك..
والرعشة
ساكنة فى تفاصيله واحساسه
والحِس بيطلع منه ضعيف
..
كتبولي عيونك كمسكن
وانا كل ماابصلها اتألم
واحلف ب يمين اني مااكمل
وبنظرة كمان
ارجع اسلّم
ازاي بيشوفوا الدوا فى عينيك
. وانا كل اوجاعي بنظرتها
بتفكرني بخرطوش مليان
بيصيب القلب وفى المليان
بيشل النبضة ودقّتها
..
ده خطوط الأرض ودوايرها
بتدور فى مدار نظرتي لعينيك
وبتخلق حوالينا فصولها
من شتا لخريف لربيع للصيف
و انا بين نظراتك بتفتفت
وباحسّني واقف وانا قاعد
وباحسني ماشي وانا نايم
والدنيا فى عيني بتتشقلب
والعمر مابين ايدك الاتنين
معصور فى كاسين
حواليهم ورد وضي شموع.
..ف انسوا الموضوع
انسوا الموضوع اني اتسكّن
من نظرة عين
.. دانا نظرة عين بتدوبني
ولنظرة كمان
محتاج قلبين
او قول عمرين
