مارشدير …. للشاعر محمود القصبى
وبدون انذار
العمر الفاضل يتنحي لشده قهره
الكوكب سايب خط السير
ومصمم يرجعها بضهره
ولا شاف أرواح ولا عاش افراح
ولا فرق بين ملاكي وتاكس
وف لحظه يحول في المنهج
ويبدل كل حرام للعكس
والعكس ف عينه تملي صحيح
انت ف حسبانه يادوب تصريح
هتعيش لو كان ديلك مقطوع
وتموت علشان فهمان وفصيح
_
لو شوفت في يوم اللون ل ابيض
قول لونه هباب
وان شوفت الحق خرم عينك
انطق كدااااب.
واشهد ع السايب والغايب
قول احلي غياب
ولسانك دايمآ سوط جلاد خليك سباب
زييف في يقينك وف دينك ومعاك اسباب
(ال ق دس) ماربك يوم سابه انت المتساب
لو بعت ف بحرك والمينا
لو كل يومين تأني سفينة
لو هانا ( يhو دي ) ف أراضينا
وعمل م (الدm) كاسات عناب
هيجيلهم يوم منزوع النوم
سايبينهم حبه بيتعاهروا
الكوكب سايب خط السير
ومصمم يرجعها بضهره
_
شايفين اعلام الوان الطيف
ملعونة يادي الناس والألوان
دهسوك يا فصيل الرجاله
علشان عايزينها ف ايد نسوان
الراجل دهرآ ورا دهرآ
بتقل رجولته إن قل المال
الناس ولا سمعت في الراديو
عن حاجه تسمي حرام وحلال
ابليس كان قاعد ومبيت
يتفرج علي شياطين المال
كانوا يقروا ياسين جنب الميت
بقوا يرموا ف قبره قماش اعمال
بالخير والحب ووش بشوش
وطيابه النية بيتظاهروا
_
الكوكب سايب خط السير
ومصمم يرجعها بضهره
_
مسحول مع فكرك وقرينك
مجرور من كمرك والاستك
الناس مشاعرهم حساسة
أما أنت مشاعرك دي بلاستيك
ايه يعني ف شدة الصحبة تقل
ايه يعني رفيق الرحلة يمل
ايه يعني يكون
الحب يخون
الحب يهون
الحب يذل
الحيرة مش في الشبه عفاريت وبني ادمين
الحيرة شيخنا التقي سابهم يسبوا الدين
يامجمع الاشقيا دهسوا العيال ابريا
نصروا الظلام ع الضيا
و حرموكوا حتي البكي
في إن انتوا تتظاهروا
_
الكوكب سايب خط السير
ومصمم يرجعها بضهره
_
هتموت وابقي أخرج واتفرج
اتخطوا الموتة كمان ساعة
وكأنك كداب بتهرج
وكأنك حي ودي اشاعة
مبقاش اليوم معروف م الشهر
والخلق تقول داخله مجاعة
بيصلوا ف سر صلاة الجهر
ويخافوا يعلوا السماعة
طب ذمة ودين تبقي دي دنيا
ولا احنا وقعنا ف بلاعة
وحصيلة عمر البني ادم
الكل مصمم علي نهروا
_
الكوكب سايب خط السير
ومصمم يرجعها بضهره
_
أنا كنت براء ك بياض الطير
أنا كنت بشوفني ك غير الغير
دلوقتي بشيل حظي الفقري
وبدوس وانا اصلا عكس السير
الناس انقرضت مش قلت
حرامين الروح اللي اتذلت
الدنيا بتكنس وما خلت
قناصة الحق ما يوم جلت
كل اللي يخونوا وبيجاهروا
_
الكوكب سايب خط السير
ومصمم يرجعها بضهره
