طريقة تمليح الزيتون الأخضر هذومة شوية وصفات تمليح للزيتون مع شاف عمر

 طريقة تمليح الزيتون الأخضر هذومة شوية وصفات تمليح للزيتون مع شاف عمر

*الزيتون المفشخ و الا المفرشخ كيما تقول أمي يرحمها

زيتون من غير قلوب

 وزيتون الاكحل المتمر هو زيتون القفه

الزيتون المفرشخ

5كغ زيتون.

نص رطل كمون

1\2 كغ من الملح.

 دبابز بلار

. 2 مغارف زيت الزيتون.

الطريقة :

1-تغسل الزيتون بالباهي ومن بعد تضربو شوي بحجرة و الا يد المهراس وتخليه في الماء لمدة 5 ل 6 ايام وكل يوم تبدلو الماء باش تنقص المرارة.

2- وتحطوا في دبوزة بلار تعوم عليه الماء وعصير الليمون وتزيدلو كمية الملح والكمون

3- مغرفتين زيت زيتونة باش ما تتكونش الطبقة التعفن وتسكرها لحد ما يجهز الزيتون.

 *زيتون من غير نواة

5كغ من الزيتون الأخضر

1.5 الليمون للعصير .

 ليمون مقطّع أربع قطعٍ.

3 ل من الماء

 لكلّ ليتر من الماء 7 ملاعق كبيرة من الملح الخشن

 وملعقة كبيرة عصير الليمون

. ماء. فلفل أخضر حار.

الطريقة:

1- تغسل الزيتون وتبيتو في الماء لمدة 3 ايام وكل يوم تبدل الماء .

2-تنحيلو القلب بالاله الخاصة بيه ومن بعد تحطو في دبوزة بلار او جرة

3-تحطلو كمية الليمون والملح والماء المذكورة والفلفل يبقى اختياري

  4- تحط مقدار من زيت الزيتون لتفادي التعفن وتسكر عليه لفترة اسبوعين مايدخلوش الهوى ومن بعد تحل الدبوزة .

نصيحة صغيرة

تنجم تطلعو من الماء وتحطو مع كليل وزعتر وزيت زيتون هريسة عربي وثوم بعد ما تنحيه من الماء و تاكل بنة

 *زيتون المتمر او زيتون القفة

1-زيتون اسود تغسلوه جيدا و تحطو في كسكاس ويتسقطر.

2- تاخذ سطل تحط فيها فرشة زيتون و فرشة ملح يعني فرشة بفرشة مرة زيتون و مرة فرشه ملح لحد ماتكمل الكمية الي عندك تسكر عليه وتثقلو بحاجة رزينة

 وكل يوم تكب كمية الماء الي طلعها لحد ما ينشح الماء منو و بعدها يكون جاهز للاستعمال

هك تكون مونتك حضرت مع شكشوكة نابلية و الا مرقة بطاطا و سلاطة مشوية و خبيزات طابونة نودك و لا نشهيك

و تنجم في فطور الصباح مع زيت زيتونة و خبز ملاوي يا عيني يا عيني

صحة و بالشفاء

شاف عمر

.