المعلم بين الترهيب والترغيب كتبت د. إسراء اسامه الطماوي

المعلم بين الترهيب والترغيب

كتبت د. إسراء اسامه الطماوي

كتير من المعلمين بضم الميم ( ُ )

شاطر جدا في مجاله كشرح مادة علميه

ممكن بمجهود بسيط يوصل المعلومه ويكون على اطلاع تام بل وفراسه بأهم الاسئله اللي ممكن تكون محور امتحانات

لكن يفتقر ويفتقد لأهم عنصر من عناصر جذب ذهن الطالب

( الحنان والمرونه)

فتاخد حصته شكل الملقن والمتلقي طول الوقت

هو منظم حاطط لنفسه خطه عايز ينجزها ( غالبا بيقدر)

لكن مش حاطط اي احتمالات للخروج عن النص

زمان … ايام المسارح والفن الجميل

كان الفنان المتميز هو اللي يعرف يخرج عن النص بدون

إتلاف للمحتوى ولا ضياعه

الفنان الكبير رحمة الله عليه فؤاد المهندس في مره وجد أن الفنان حسن مصطفى نسي كلامه المكتوب والملقن مش موجود ف قاله بسرعه ( خارجا عن النص) اخرج دلوقتي انا عايز اقعد لوحدي يا حسن فهم الفنان حسن مصطفى وخرج ورجع تاني اكمل المشهد ارتجاليا وكملوا الفصل

المعلم مدير لحصته ومدير لخطته الدراسيه

عشان كده المعلم لازم يعرف ازاي يكون مدير شاطر

لا بالمسف ولا بالصارم اللي مبيقبلش اي ارتجال في حصته

ولا واضع اي دقايق في خطته الزمنيه للخروج عن النص

فيما يفيد نفسية الطالب

للاسف شريحه من المعلمين حبت تعمل عنصر الجذب ده للطلاب فلقينا المعلم واقف يرقص وماسك ميكروفون وطبله

او الآخر رافض تماما ف بيتعامل بصرامه تفقد التعلم بهجته..

خدها قاعده ( أساس الشغف للعلم … تحقيق الاستمتاع)

المتعلم لما يلاقي 💡 لمبه نورت لما فهم اشياء جديده

هيفرح… محدش بيفرح ولا يستمتع بطعم شيء وهو

خايف ومضغوط لان الخوف بيبوظ كيميا الدماغ

فأنت ربان سفينتك

بس اعطي الفرصه للملاحين الصغار يتعلموا منك ازاي بتقود سفينة العلم

تكون مرن غير مُهان

وحاسم بدون صرامه وتكشير وترهيب

خليك مدير بين الترهيب والترغيب

بقلم

د. إسراء اسامه الطماوي

#استشاري_ادارة_منشآت_تعليمية