معلومات مهمة ومفيدة فى المطبخ
متابعه غاده المصري
لو الحله سخنت على النار ما تحطيش السمنه او الزيت على طول هيتحرقوا حطى البصل الى هتستعمليه هياخد الحراره وبعدين حطى الماده الدهنيه
اى حاجه على النار عاوزين تزودوها ميه لازم الميه تكون سخنه جدا عشان تحافظوا علي لون الطبخه خصوصاً الفول المدمس والباميه والفراخ واللحمه المسلوقه
قبل ماتحطوا الكاكاو للكيك انخليه علشان مايعملش تكتلات
لو بتعملى الكيك بالسمنه اضربى السمنه مع السكر وبعدين ضيفى البيض بالتدريج بيضه بيضه
لو بتعملى الكيك بالزيت اضربى السكر مع البيض الاول وبعدين ضيفى الزيت بالتدريج
وانتى بتطبخى او بتعملى رز استخدمى سمنه على زيت
الخولنجان بيطرى انسجة اللحوم بكل انواعها استخدميه فى التتبيله بيسرع السوا جدا وبيساعد على امتصاص التتبيله
( ملحوظة الخلونجان نوع من انواع النباتات مشابه نبات الجنزبيل )
ورق الزهر (زر ورد جاف ) من عند العطار اطحنوه واستخدموه فى التتبيلات تحفه جدا وبيعطر الأكلات
كل المطاعم بتتبل المشويات بخليط من الخولنجان وورق الزهر والزعتر والروز مارى والأوريجانو وغيرها من الأعشاب
محلول النقع بنحط ليمون ماينفعش خل لان الخل بيثبت الزفاره مش بيشيلها
كمان الخل بيخلى الفراخ تشد
الخل بيفرتك نسيج الفراخ اه ولكن بيخليها بتشد
استبدلوا الخل بالليمون فى غسيل الفراخ لان الخل بيثبت الزفاره ما بيضيعهاش وفى تنضيف الممبار كمان بلاش خل حطوا ملح وليمون وقشر الليمون
الخل ممكن نضيفه للكبده للبطاطس معلقه منه على الكيك وفى الشاورما
اظن كده انتهت اسطورة الخل
انا بستعمل الخل كمان فى التنضيف وفى القضاء على النمل وبحط شويه على البريل بيطهر الصحون وبيلمع الاستانليس
اعملى ازازه بخاخ حطى فيها بريل على شوية خل وكملى شوية ميه هيوفر جدا فى البريل او النوع الى بتستعمليه
قبل ماتحطى اللبن فى الحله على النار حطى معلقتين ميه لا يمكن يلزق ابدا
اللحمه الضانى لو هاتشويها ياريت التتبيل يكون قبل الشوى على طول
لو هتسلقيها ضيفى نص معلقة خل بتساعد على سواها بسرعه وكمان بتضيع الطعم شويه والريحه للناس الى مش بتحب ريحتها
لو خزنتى الكرنب ورق بعد ماتحشيه اسقيه بشوربه ساقعه علشان مايجلدش
ورق اللورا بيساعد على تفتيح لون انسجة الفراخ وبيعطر الفراخ وانتى بتسلقيها ومفيد جدا للعظام والحاله الصحيه
لو عندك توم ناشف وفصوصه صغيره انقعيه فى شوية ميه وبعدين قشريه هيبقى سهل
لو بتقطعى خضره او اى حاجه خضرا ورقيه حطى على لوح التقطيع رشة ملح علشان ما تتطايرش منك
فى اكلات ماينفعش نغطى الحله واحنا بنسويها زى العدس والبصاره والويكه والرز بلبن والمهلبيه والمربات والملوخيه والحليب
فى اكلات ماينفعش نغطى الحله بعد مانسويها مش واحنا بنسويها بس زى الملوخيه والسبانخ ده وهما لسه سخنين طبعا.
