حدانا في البلد عادات وتقاليد للعائلات
أي زوجه تقول لأخو زوجها يا عم حتى لو أصغر منها ب 20 سنه , و أخت الزوج اسمها عمّه , ده لا قهر ولا استعباد , دي موده ومحبه .
حدانا في البلد وعاداتنا
أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه , لو كان عندها ألف فدان يقول لها يا خاله , ولو بتبيع جرجير قدام الجامع يقول لها يا خاله .
حدانا في البلد وعاداتنا
العم بيتقال له أبوك فلان , روح هات كذا من بيت أبوك فلان , اللي هو عمك , و الجد بيتقال له سيدي فلان و أي راجل عجوز بيتقال له يا سيدي
حدانا في البلد وعاداتنا
الإبن حتى لو كان أستاذ في الجامعه يبوس إيد أبوه و أمه و عمه الكبير و خالته الكبيره , يوطي و يبوس ضهر إيدهم مش يبوس خدهم .
حدانا في البلد وعاداتنا
لو حد تعب البلد تتقلب , ولو حد مات كله يعزي و يجهز أكل للضيوف اللي جايين يعزو من بره البلد ( كل بيت يجهز أكل ) , و في الفرح كله يحضر من غير كارت دعوه , من غير قاعه , البلد بتبقى هي القاعه .
حدانا في البلد وعاداتنا
ناس بتصحى من الفجر تركّب العده عالحمار و تعلّقه في العربيه الكار و تربط البهايم في العربيه من ورا و صوت ماكينات الري يظهر مع أدان الديوك , و أرض عطشانه بتشرب و عصافير بتسبح ربنا .
حدانا في البلد وعاداتنا
لو ماشي وشايل حاجه بتتاكل جايبها من الارض لازم تعزم عالناس اللي بتقابلك , خد لك شوية بصل أخضر لسه بطينهم أهم , خدي لك كرنبه يا خاله .
حدانا في البلد وعاداتنا
ناس بتنام بعد العشا , إيديهم خشنه و مشققه , بينامو مهدودين و مبتسمين , لا سمعو عن أمراض نفسيه ولا يعرفو السيبراليكس و لا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .
حدانا في البلد وعاداتنا
ضحكه بتطلع من القلب و كلام حلو , صباحك نادي , خلّي عنك , العوافي , من يد ما نعدمهاش .
حدانا في البلد وعاداتنا
طرنبة مايه عمرها أكبر من عمر كشك عالخليج و شجرة عمرها أكبر من عمر أمريكا .
حدانا في البلد وعاداتنا
وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .
حدانا في البلد وعاداتنا
أدب و خجل و توقير للكبير و فيها حياه , حاجات كتير اختلفت بس لسه فيها حياه
