شويه حاجات نتكلم فيها هتفيدك جداً بما اننا قربنا خلاص على رمضان وتجهيزاته

شويه حاجات نتكلم فيها هتفيدك جداً بما اننا قربنا خلاص على رمضان وتجهيزاته

وبرده قولولي رأيكم وافكاركوا

عارفه البطاطس الصغيره اللي اد البليه الكيلو منها بعشره جنيه والعيال بيموتوا فيها هاتيها اغسليها كويس واسلقيها وممكن تحمريها في الزيت او تدحرجيها في حته زبده بلدي أو تهرسيها بيتعمل منها حجات كتيره أوي زيها زي الكبيره واحلا كمان

وممكن تجيبيلك خمسه كيلو بخمسين جنيه وتبقا وفرتي وعملتي حاجه عظمه

عندي توم مفروم في الفريزر مش بيخليني أكسل أحط توم ع الاكل علشان بتضايق من تقشيره كل شويه كمان بيوفر مكان اللي تحطي فيه التوم بقشره

برطمان فيه فلفل هريسة فلفل شطه حار مفروم وعليه شوية توم أو لا براحتك في الفريزر بتحطي في حشو السمك أو بتنجان كمان بتاخدي منه ع قد حاجتك وده كويس عن إني أعمل كل شويه ممكن يطلع شويه عن اللي عايزه أوا كتير

بيكون عندي كيس صغير في الفريزر فيه شويه خضرة شبت بقدونس مفرومين لأي ظرف عايزه أعمل حاجة ومش متاح أجيب خضرة في الوقت ده

الكوسه لما تقرب تبوظ بقطعها واشوحها في بصله وع الفريزر وتنزل ع الصلصه علطوول

الليمون برده بيتعصر ويتحط في مكعبات التلج بتستخدميه في عصير أو ممكن في غسل الطيور

الصلصة

أي طماطم بتقرب تبقي طريه في الخلاط وع الفريزر وممكن تجيبي طماطم مخصوص تعملي بيها

وبعمل صلصه متسبكه في علب صغيره لو احتجت كميه صغيرة علي أي حاجه أو أكمل علي المكرونة لو محتاجة يبقي موجود بسرعه

اللحمة المفرومه

ممكن تعصجي منها شوية وع الفريزر تاخدي منها ع مكرونة بشاميل أو تحطيها ع مكرونة عاديه ولو احتاجتي في أي وصفه معلقتين تلاته يكون عندك

ولو بتعملي كفته تصبعيها وتسويها وتحطيها ف اطباق فل وع الفريزر تنزليه يفك ويتحمر تحت شوايه البوتاجاز وكده عملتي الغدا

الكرنب وورق العنب والبتنجان جهزي صلصتهم في الفريزر علشان تقللي من مجهود المحشي وكمان ممكن تجهزيها من بدري

برطمان فيه دقيق وملح خشن لغسل الطيور و برطمان دقيق وتوابل للسمك🐟🍙🐔

بحب أحط كيس لبن في الفريزر لأي ظرف أحتاجه

🥛🥡

في بخاخه فيها صابون وخل وكربوناته وشويه ميه وتمشي بيها ع أي حاجه تنضفي بوتاجاز تلاجه رخامه الخ

الوايبس أنا بستخدمه في أي حاجه تقابلني البوتاجاز والتلاجة و الرخامه وجمب زراير الكهربا والشنط والأحذية

بجيب نوع مش غالي وفيه عدد كبير

لما أي برطمان بهارات أو أي حاجه يخلص اغسليه قبل ما تحطي فيه الجديدلو حاجة فيهم اتوسخت ابقي مري ع البرطمانات كلها بمناديل