الميزان اخْتَل
بقلم الكاتبة والشاعرة
حنان فاروق العجمي
حتى انتِ طَرَحْتي قساوة
آه منِّك أرض غدَّارة
مهما جزوري امتَدِّت بَتَّارة
إوعي تفتكري هيأس
وفِ الحِيط هَلبِس
طَب قولي على طيبتِك أمَارة
طول عمري مطحون وفاكرها شطارة
ازرع وأرفع فيكِي منارة
ولسَّه ف هواكي متَبِّت ورِجْلي مدَبِّس
وأقول مَعلِش وأبسْبِس
بَس بُكرا هتِتْعِدِل واتكِسِر وقلبي أَجَبِّس
مبروم على مبروم ميْلِفِّش
ورغم قساكِي فيكي أنا بَقْفِش
يا بنت الإيه ياما رَوِيتِك
وعلى راسي شِلْت وحَطِّيتِك!
معقول مش شايفة إنِّي راعيتِك!
أنا خُوفت منِّك وهَكِش
وقوام برمتيلي الوِش!
طب أعمل إيه عشان أرضيكِي
وعلى أد لحافي مَدِّيت أراضيكِي
وعايش غلبان بَراضيكي
والرزق على الله
وآخرتها مِتْر ف مِتْر هنام فيكي
طب وحياة العيش أبو رَدَّة
هوَّ عشايا وبيه أتغَدَّى
حتى نظام الطَيِّبين مَنفِعْنيش
أجيب منين لحمة ونوتيلا
على أد الحال ومَحِلتيش
وعيالي بياكلوا القراقيش
كُلُّه دِقيق فِ دِقيق
ووضعي أصبح ضَيَّق ودَقيق
ولا طيبين ولا أشرار
وفراخي قاطِعتها وجالها انهيار!
طب أزرَعِك إيه وممنوع الخُضار!
زَعَّلت شَقِّة البطيخ!
عنها وغِضْبِت هاتَك يا صريخ!
مفيش حاجة تبِل الرِّيق
هرمونات على مُبيدات
هنعِزِل وللموج هعمل مَصَدَّات
هات يا ابني عود قصب هات
يمكن تحصل معجزات
هوَّ الشافي المُعافي
أَقَلُّه أفضل دافي
باقي الفاكهة هجافي
على ما يشوفلنا حل
وآمِن على روحي من مرض مُحتَل
حت
ى الشجر رفع علينا الفاس!
والميزان مش مظبوط اخْتَل
