الاكتئاب واسبابه وأعراضه وطرق علاجه
بقلم -دكتور نسرين صلاح
متابعة-رشا حافظ
عمرك حسيت إنك مخنوق ومش فاهم ليه؟
أو حاسس إن مفيش حاجة بتفرحك زي زمان؟
ممكن تكون دي مش مجرد “نوبة حزن عادية”، لأ، ده ممكن يكون اكتئاب، وده مرض نفسي حقيقي ومحتاج اهتمام وعلاج.
طب يعني إيه اكتئاب؟
الاكتئاب مش ضعف شخصية ولا قلة إيمان زي ما بعض الناس بتقول، ده اضطراب نفسي بيأثر على طريقة تفكيرك وإحساسك وتصرفاتك، وكمان بيأثر على صحتك الجسدية ومزاجك العام.
ايه اللي ممكن يسبب الاكتئاب؟
مشاكل في كيمياء المخ زي نقص السيروتونين والدوبامين.
عوامل وراثية (يعني لو في العيلة حد اتعرض لاكتئاب قبل كده).
ضغوط نفسية زي فقدان شخص غالي أو التعرض لمواقف صعبة.
أمراض جسدية مزمنة أو مشاكل هرمونية.
طب ايه أعراض الاكتئاب؟
إحساس بالحزن أو الفراغ طول الوقت.
فقدان الشغف بأي حاجة كنت بتحبها.
قلة أو زيادة في الأكل أو النوم.
تعب وإرهاق طول الوقت حتى من أقل مجهود.
جلد ذات ولوم النفس المستمر.
أفكار سوداوية أو إحساس بعدم القيمة.
طيب بيتعالج ولا لأ؟
أكيد بيتعالج!
العلاج ممكن يكون عن طريق:
جلسات علاج نفسي زي العلاج المعرفي السلوكي (CBT).
أدوية مضادة للاكتئاب تحت إشراف طبيب نفسي.
دعم نفسي من الأهل والصحاب.
تحسين نمط الحياة زي الرياضة والنوم الكويس.
نصيحة ..
لو حاسس إنك مش كويس، اطلب المساعدة. مفيش حاجة اسمها “استحمل”، صحتك النفسية أهم حاجة في حياتك.
وافتكر: أول خطوة للعلاج هي إنك تعترف بالمشكلة وتسعى تحلها _التعافي_من_الاكتئاب
#نحو_التعافي
#شجاعة_الشفاء
#التعافي_حقنا
#التغيير_يبدأ_الآن
#تعليم_ودعم
#صوتنا_مش_مكتوم
تحياتي..
د.نسرين صلاح
دكتوراه في الصحه النفسيه والارشاد الاسري
اخصائيه تخاطب وتعديل سلوك
البِدَايَةُ_لِمَنْ_يَجْرُؤ
