لحظة فقدان … الشاعر أمير فياض
لا فهمتي الشعر
ولا حتى فهمتي انِّي بحبك
ولا شفتي الكون في هدوء و سكون زي ما حسيت
و عاملتي مشاعري بسطحية
لو كنتي صبرتي و حسيتي
أنا كنت بنيت في العشق عشيّة
و صُبحية
و بنيت أرضية و سُطحية
فتكوني الغيّة الميّالة
وانا اكون الغاوي الملهي في سيرتك على عينه
أو تبقي الأرض السيّالة
و أنا سقَّىٰ بيملالك مخصوص
أنا مرة حلمت انّي بـَ احارب
و اتقتلوا كتير
و الباقي اتاخدوا مع الأسرىٰ
حسيت بالخوف
و جريت هربان اتدارىٰ بقلبي
من الحسرة
عيَّطت بحرقة و حنيّة
عليت الصوت
على قد ما كان ينفع يعلىٰ
بس ما فادنيش
العَدو ما هُوْش جندي هيقتلني
و هَيوَلِّي
العَدو معشِّش و مْوالِي
لو قلبي هيقدَر وِ يمَلِّي
كان جهِّز وصف لكمّ القهر
اللي في جوفُه
أو جهِّز حاجة يقولها لِي
و ساعتها هتفهم و أنا هافهم
كان ليه الصبر بيغمز لِي
أنا مرة حلمت انّي بـَ احارب
و صحيت على صوتها بيهمس لِي
” الحرب كبيرة عليك يا حزين
خسران .. خسران
وما فيش لا سلاحك ولا أهلَك
أنا كل اللي اقدر اقولهولك
إنَّك هتحارب .. هتحارب
و انَّك هتحارب و لواحدك”
