( لسه فيكِ حيل تعافري
لسه واخدة العند غية )
الشاعرة وفاء علي
لسه برضوا فاتحة قلبك
للغريب زي التكية
لسه شايفة الدنيا وردي
و العيون لامعة و شقية
لسه بتصوني الجمايل
لسه باقية ع الوعود
للي خاين و اللي بايع
لسه ماوضعتيش حدود
لسه فيكِ الطيبة باقية
و ابتسامتك هي هي
لسه جوه الكف راسمة
م الوجع مليون طريق
لسه رغم الغدر شايفة
كل شيء ف الكون بريء
لسه سايبة عينيكي قشة
للي ف الأحزان غريق
لسه صالبة الطول و شايلة
م الامل مليون وقية
لسه فيكِ حيل تعافري
لسه واخدة العند غية
لسه رغم الضعف ظاهرة
للصحاب صلبة و قوية
لسه بير أسرار لأهلك
لسه حمالة قسية
لسه بنت بألف راجل
صاحبة جدعة تساوي 100
لسه فيكِ حيل تعافري
لسه واخدة العند غية
