ولا هنتي … الشاعر محمد ياسين الكاشف
ولا هنتي
ولا عمرك تهوني ف يوم
دنا إللي عشان غرام قلبك
خاصمت النوم
يا عايشة ف كل أيامي
و شفتك أحلى أحلامي
و صورتك لسه قدامي
رضيت بالحظ و المقسوم
تهوني إزاي
و أنا إللي باشوف معاكي الكون
و شايفك رايحة
فين ما باكون
أنا يا حبيبتي مش مجنون
ولا فرعون
و كل كلامي كان عنك
و عن سحرك
و عن عشقي إللي جوايا
و عن قلبي إللي داب فيكي
كلام موزون
أنا مش قيس يا مولاتي
ولا إنتي كمان شبه ليلى
لكن حبيتك إنتي و بس
و خليتك ملاك روحي
و بلسم قلبي و جروحي
و إنتي أحلى ليلاتي
أنا في الحب مش عنتر
لكن باعشق و باتغندر
و أشيل سيفي
و أطيح في الكل و اتمخطر
و أشيل قلمي
و أقول عنك غنا و مواويل
و أدوس ألمي
و لاجل عنيكي أتحمل
عشان ماقدرش اسيب قلبك
في حرقة و ويل
و مين حتى إللي قال إنك
في يوم هنتي
و لو كنتي
بعيدة حتى عن قلبي
لا يمكن برضه هانساكي
ولا أتخيل وجودك حتى
مع غيري
دنا اتنفست من روحك
هوا روحي
و شفت النظرة في عينيكي
دوا جروحي
بعت وراكي حراسي
عشان تحرس خطاويكي
ملاك م الجنة يندهلك
يطيب بالغرام قلبك
و يرقيكي
تهوني إزاي
يا أجمل من صبايا الحور
يا مالكة القلب باديكي
و سايباني ألف و أدور
كتبت الشعر لعينيكي
و ليا ف كل بحر ديوان
لكن بحرك رماني بعيد
و ساب الموجة
تحدفني لمصير مجهول
لا أنا عارف أطول موجك
ولا عارف أطول شطك
سرحت ف كل أحوالك
و مين بالهجر أوحالك
و مين عرفني على حالك
و سابني أتوه في ليل حالك
شغلتي القلب ميت مرة
و عمري ما جيت على بالك
تهوني إزاي
و قلبي إللي انكوى من البعد
بيحلم بالوصال و القرب
في نن العين كمان شالك
أنا الحيران بعيد عنك
و أنا التايه و أنا منك
و أنا إللي خلفت يوم ظنك
عشان خدتيني من روحي
جنيتي عليا من غير ذنب
و قلتي إنك في يوم
هنتي
لكن و الله يا حبيبتي
لا عمرك غبتي عني ف يوم
ولا نسيتك
برغم التوهة و الزحمة
ولا هنتي
ولا هنتي
