حضن الوفا … الشاعرة منال محمد
أنسب طريق فيك من دفا
بلاقي فيه لمسة حنان
بتداوي روحي من شروخ
كل البشر
هنا بس أقدر أوصفك؟!
و أكتب حروف متبعترة
يمكن الاقي الإجوبة ؟؟
يمكن أحس إني هنا
جمبك أكيد
بعدك عنيد
حضنك وليد
رغم أختلاف الأزمنة
حضن البيوت فيك من وسع
بشتاق حنيني لبيتي فيك
بسرح و روحي تروح إليك
عشقي ل عينيك
شيء يستحيل أن يغتفر
فيك م العطش
و أتمنى روحي ترتوي
في القرب منك
فيك الحنان ده طبع غالب
حتى الآسى مابين أيديك
دايما يلين
تعرف بحس معاك بإيه ؟!
بحس إني زي الملاك
بحس إني دايما معاك
بحس إني فوق غصون كل الشجر
بطرح أمل
و بغني عشق السكرانين
لحظة غياب
فكري إللي شارد
قلبي إللي تايه
جوه منه شعور بخوف
إنت الأمان الشافي ليه
بشتاق لمين
غير بس ليك
و إنت الأكيد
و النبض ساري بالوريد
يقول حقيقة معلنة
إنت الهوى و الزاد
و أنا بقوى بيك
و بحسب إني نغمة حنين
تعزف غرام و تقول حلال
أنا أصلي منك و كمان إليك
بشتاق و أميل
على حضن عمره ما ضلني
و ياخدني مني يهزني
فبحس إني بتولد بيه من جديد
