ازيك أنتى … الشاعر أمير فياض
حِلفت تحط الشوق وبسم الله
قلت ارضِي إيدها وادوق ومش هاشتاق
علِّم معايا الطعم مِلْت لها
والميلة رابطة وعقد بلا أوراق
لو خيَّروني ساعتها / دمت لها
بس الدوام لله والوقت كان سرَّاق
لو سد عنها العمر سبت لها
لو غيرها صمت انا عاشق الضوضاء
وقت امّا جت لي الفرصة رحت لها
بس في مكان معصوم من الأحياء
بررت بعدي كتير وقلت لها
والله ما اخترت الفراق
لو تدخليني تلاقي روحي بتسقي زرع اسود
شكل الجناين عتِّم الأجواء
الفرح ما بيحودش غير عنِّي
شكل اللي سايق جرح / مش سوّاق
يوم ما اتلاقيتك .. نسبوا ليا الراحة أب وأُم
بُعدك قتلهم .. قلت هاورثهُم
لا سابولي مال ولا سابوا باقي يضُم
خابت ظنوني وورثوني الداء
الوضع ساء وفْ أسوأ اللحظات
الناس تقول “الناس لناس فترات”
وانا كلي ليكي ازاي تروحي واعيش
فاردة الحقيقة صوان والرؤية عندي مافيش
كل الحضور نظرات ما بينا وكوم صُدَف
صَفّ العزا مليان شهود على حزن جاي
وشْهِيقي شاهد .. كل أنفاسي اللي كانوا مروَّحين
واقفين في صدري بيسألوني ازاي؟!
ومشاعري فايرة وفيا بتأذي
لو ألف مرة تعدي هتعزي
ويفكروني عينيكي والعجز اللي حيلتي
وبتسأليني ازَّي حالي ووحدتي؟!!
انا مش تمام .. ازيك انتي؟!
أمير_فياض
ازيك_انتي
