فوضى الأطفال الموجهة بقلم دكتورة إيمان يحيى – إستشارى نفسى إكلينيكى

فوضى الأطفال الموجهة

بقلم دكتورة إيمان يحيى – إستشارى نفسى إكلينيكى

إسمحولى قرائى الأعزاء التحدث بالعامية فى هذة المقالة،كتير من الأمهات بيشتكوا من طفلهم، بيجرى – بيتشاقى – بيلعب بعنف – بيشد زملائه . وغيرها من السلوكيات .

طيب إنتى كأم تتصرفى إزاى، وتعملى إية؟

١- طفلك مش فوضوى، هو ببساطة ملقاش فرصة لتوجيه طاقته

.٢- طفلك مش شقى ، هو ببساطة مش عارف يعبر عن نفسه بالكلام، فبيعبر بالحركات .

٣- إنزلى لسنه وإلعبى معاه عشان توصلى لطريقة تفكيره.

٤- إشتركيله فى أنشطة رياضية وفنية مناسبة ليه يفرغ طاقته فيها.

٥- متقارنيهوش بحد ولا تشتكى منه وخصوصا أدامه عشان ميعندش ويلجأ للعنف فى المعاملة لتعويض قصوره.

٦- هاتيله ألعاب مفيدة يشغل فيها نفسه بعيد عن الموبايل وتكون مفيدة لذهنه زى البازل والمكعبات ولضم الخرز وتأليف القصص.

٧- الإهتمام بالأكل الصحى وبلاش سكريات كتير أو شيكولاتات ومياة غازية، كل دة بيزود الشقاوة والفوضى عند الطفل .

٨- الحضانة الملائمة مهمة فى تعديل سلوك الفوضى وتوجيهها بشكل أفضل فى أنشطة بناءة .

٩- متهمليش إبنك وإتكلمى معاه بما يناسب سنه ، عشان تقربى منه وتعرفى تسيطرى على سلوكه بدون تسلط.

١٠- متعتبيش إبنك لما يكسر لعبة من غير قصد هو بيحاول يستكشف، والمحاولة دة بتنمى عقله، لكن لو قصد وكررها وعارف غلطه إحرميه من العوض عنها عشان يقدر قيمة الأشياء.