تأثر طفلي بأصدقائه، سواء من العيلة أو الجيران أو الاقارب أو المدرسة أو الشارع

تأثر طفلي بأصدقائه، سواء من العيلة أو الجيران أو الاقارب أو المدرسة أو الشارع..

 

متابعه.. شيماء العراقي

الطفل في الاعوام الاولي من عمره بيتأثر بشكل قوى بالبيئة المحيطه، ودا طبعًا بعد تأثره بـ الاب و الام

المشكله في الغالب بتكون في تأثر الطفل بشكل سلبي

تحس الأم انها بتربي في اتجاه

و تأثر طفلها بالمحيط بيشده لاتجاه تاني

او يكاد يكون بيهد اللى هي بتبنيه

.

اعمل اييييييه ؟!!!

.

اسلكي طريق ” لا تراجع و لا استسلام ”

لا تراجع عن نيتك اللى اخلصتيها لله

انك تربي ابنك تربية حسنه

ولا استسلام امام اي عقبه تواجهك في رحلتك

 

ودا هيحصل لما طفلك يحس انك قويه فعلًا

قوية بحبك واهتمامك ورأيك الايجابي وقرارتك النافعة

 

دا هيحصل لما تاخدي موقف حازم و صارم

أمام أي عقبة هيدفع تمنها طفلك

 

– المكان اللى هيأثر على طفلك بشكل سلبي

امنعي تواجدكم فيه

وإن كان الامر صعب عليكي

يبقا تحاولي تقللي تواجدكم فيه بقدر الإمكان

 

– وصلي لطفلك من خلال قصص قبل النوم

أو أثناء لعبكم بالعرايس

الاخطاء اللى عايزاه يتجنبها

وما تركزيش على موقف بعينه أو شخص بعينه

وصلي المعلومه من خلال القصه بشكل عام

فتترسخ في ذهن الطفل انها قاعدة عامة، اني معملش التصرف دا أو أقول الالفاظ دي

 

– نقطه مهمه جدًا، بلاش تدخلي في نقاش حاد مع طفلك ادام حد، أو تنتقدي شخص بعينه

اتكلمي معاه بهدوء وود واتكلمي عن التصرفات نفسها مش الاشخاص

لأن الطفل ممكن يتمسك اكتر بالشخص اللى بتنقديه

 

– لو قدرتي تنبهي الأشخاص أو تغيري في البيئه المحيطه بشكل إيجابي، يكون أفضل طبعًا

 

– لو عند طفلك عادة سلبيه عايزاه يبطلها

ما تركزيش علي انك تخليه يبطلها..

ركزي على انك تشغلي وقته باللي يخليه يبطلها

 

– حطي برنامج ليوم طفلك والتزمي بيه

وعرفي طفلك بكل خطواتكم

واحترمي برنامج يومه

فتخلي البيئه المحيطه تخضع للبرنامج بتاعه

مش طفلك اللى يبقا قاعد فاضي للي رايح واللى جاي

 

– حسسيه بالأمان والتقدير والثقة

هيستجيب معاكي لبرنامجه اليومي

ومن هنا هتقللي احتكاكه بالمؤثرات السلبية المحيطة

 

– دعمي طفلك في كل تصرف حلو يعمله

ووجهيه بهدوء في كل تصرف غلط يعمله

 

– قوي جواه إحساسه بالثقة بنفسه وباللى اتربى عليه

فيلاقي الناس بتقلده هو وبتتأثر بيه

.

كل دا مش هيحصل في يوم و ليلة طبعًا

محتاج تنفيذ وعدة محاولات وتجارب

محتاج ثبات وصبر على موقفك

محتاج علاقه قويه بينك و بين طفلك

محتاج تقربي ابنك من بيئه ايجابية

فلا يتبقى لديه الوقت للتأثر بسلبيات أخرى

 

وخليكي فاكره ان لولا الظلام حول القمر ما ظهر مضيئآ

وان مافيش أجمل ولا أحلى من الورده اللى بتنبت بين الصخور

 

خليكي قوية وطوعي المحيط فيما يناسب نشأة طفلك