الوصية …. الشاعر محمد الخضري
قبل ما تِدبَل جِفوني
عايز اقولِك كلمتين
قرَّبي منِّي اسنديني
دا اللي فاضل حبتين
خلِّي بالِك منُّهم
داوي دايماً أي جرح يصيب قلوبهم
لمّا افارق ضِلهم..
لَزماً يحسوا انِّي حتى في بُعدي عنهم
مش بعيد لأ جنبهم
عرَّفيهم انِّي ياما كتير تعبت
و كات سعادتي ف فرحهم
فاكرة مرة لما كُنَّا مهمومين
جالي إبنك والدموع طَفَّتْ عينية
بين ايدية اخواتة متكِّلين عليه
جاب لي كيس مليان فلوس
كلها فضة وورق
قالي خدهم فِك زَنقة
و اما يبقى معاك ف يوم..
ابقى هاتهم بس كَتَر م الورق
كل مرة نقول يارب
كات بتيجي الرحمة تواً
لاجل يسعَد قلبهم
عرَّفيهم إني كنت اتمنى اكمِّل
لمّا يجمد عضمهم
عدّي دايما اي كلمة ف يوم بتفلت منهم ..
دول رغم أول عهدهم ..
عاشوا معانا الوضع كله
ساعة حلوة
و ساعة مُرة
و ساعة يهرب حلمهم
دول أحن الناس علينا
همّا بس الدنيا سِرْقت عمرهم
خلِّي بالِك منُّهم
و الصُغيّر لو باين لك..
إنُّه متعصَّب عليكِ ولّا بيطلَّع عينيكِ..
بُكرة يهدى
وقت زنقة بْيبقى راجل ينصفِك
و الكبير أصلا كبير
حسَّاس بطبعُه..
جوّه مِنُّه م الأبوة حب يكفِيه مطرحي
و الحبيبة
عيَّشوها كتير هنيِّة
تبقى دايماً متراضية..
و السعادة تبقى دايماً حظها
عارف انك تقدري تكوني أنا
ياما شوفت الحكمة فيكِ
و الجَلَد يا حنينة
كوني كعبة يحجّوا ليها
و زمزميهم بالهنا
مش هسيبكم ليلة واحدة
بدون ما ازوركم..
حتى لو كان ف المنام
إعدليني لمَّا انام
زمليِّني
خَلِّي ايدِك فوق دماغي
لقنيِّني
و امسحى بالتانية ذنبي عن جبيني
سامحى ياللي كنتِ ضهري
احضنيني
سلّمى لى كتير عليهم
ولّا اقول لك دَخّليهم
بس قَبلَة
ترسمي لي كادر لايق بالنهاية
خلِّي آخر صورة بِينِّا
ضِحكة ف عيونكم و عيني
