خبر واحد
الشاعر حمدي موسى
.يخللي الدنيا تتغير وتطلع شمس مختلفة ونهار بيعيش
وتلقي الضحك من تانى علي وش القمر مناقيش
وتتبدل جروح وآلام…..وتتنطط حروف الفرح وتلاقي ف روحها كلام
وتتشاهد عروستنا ويرقص صابع الإبهام
خبر واحد…..
يغير من مزاج عيلة.ويعمل فيها ضليلة ….
وترجع تانى تتباهى
ولو فتشتها تلقي شرفها لسه وياها
وعندها دم…لسه قادرة تبقي الأم
لسه بتنكسف وتغير
خبر واحد…..
يجيب الحب من تانى وتتحول مجاعة القلب لصوانى وتهدا الأسئلة وترتاح
وتنتشر الشموس ع السطح…..
ينزل من عينيها الصبح…..يمشى فى الحارات سواح
خبر واحد
ونتلقي التهانى عليه….وعلي حسه يجينا نقوط
ينام الليل فقير دقة……….
يقوم مبسوط
وهتقوم الجيران ترقص…وتتغير موسيقي الحزن تبقي فرايحى….بس ادعوا يارب يموت
خبر واحد…..
