برد الشتا … الشاعر عمرو الأنصاري
الليل طويل و أنا كنت فارد
جتتي ع الأرض
برد الشتا نازل بينهش في خلايا الروح
حبة جروح متقسمة لمليون غرض
دب المرض في عقول ف عرت فكرها
كان وحده من بين الجموع بيحبها
كان كل يوم يشهدلها بالحُسن
كان كل يوم يرفع إيديه
و يسلم الدعوة لملاك
كان كله بيأمن وراه إلاك
الليل طويل و أنا كنت فارد
جتتي ع الأرض
برد الشتا مش برد
طراطيف صوابع فاقدة للإحساس
بتخبي عينك عن عيون الناس
و تداري فيها الأجوبة الخاملة
كان وحده شايف نصها كاملة
كان وحده حاسس إنها شاملة
كل المعاني و الأماني هلاك
كان كله بيأمن وراه إلاك
الليل طويل و أنا كنت فارد
جتتي ع الأرض
برد الشتا إشتد
و الكون بيبحث ع الدفا الوقتي
كان كل همه يشوفها دلوقتي
يقرأ كلامها و بعد لحظة ينام
كان كل حلمه يسابق الأحلام
و ف كل مرة بيصحى بالتصديق
كان نفسه يبدأ حلمه بالتحقيق
بيقول يارب مالينا رب سواك
كان كله بيأمن وراه إلاك
الليل طويل و أنا كنت فارد
جتتي ع الأرض….
