أنا مش بخير
الشاعر كريم هلال
المرة دي
مش عارف إني أكون بخير
جربت إني فـ مرة أطير
معرفتش أوصل للسما
المرة دي
مبقتش أشوف فـ الدنيا خير
قاعد برفرف من كتير
قرّبت أوصل إنما
أنا مش بخير
ههرب لفين؟
طب لو هربت هروح لمين؟
هلاقي نفسي فأي حتة؟
لأي حد؟
ههرب بجد؟
ولا الزمن ده خلاص حبسني بقيت أسير؟
أنا مش بخير
كان نفسي حد فـ يوم يدوم
ويكون شريكي فـ كل يوم
نلبس سوا نفس الهدوم
ويشوف بدال قلبي الضرير
أنا مش بخير
قلقان أوي والدنيا بحر أنا فيه غريق
كان نفسي حد يشدني ويكون صديق
بيقولوا ليا اختار رفيق قبل الطريق
لكن لوحدي من كتير
وأهو ع العموم
أنا مش بخير
