حالة حرجة … الشاعرة عفاف أحمد التركي

حالة حرجة … الشاعرة عفاف أحمد التركي

بقي دا اسمه كلام ؟؟؟

تضحك لي عينيك أنسي الايام؟

 وأربع وخميس يتحذفوا قوام ؟

وانده لحسين وانا قصدى هشام .؟

و درج التلاجة ريموت واقلام

كل ده علشان ..

عينى جات في عينيك؟

او عدّت ضحكة في وسط كلام؟

.. مش يعنى يا عم (الغجري) حرام ؟

.. الشاي يتحلّى بملح ازايّ ؟

وفرادى الجزمة اختلفوا معاي؟

وقميص متزرر.. بالمقلوب ..

وأرسم علي ورق البفرة قلوب

وبأحدّف بعض الناس بالطوب

وبأحس كأنى… في قلب منام

والنبي يرضيك بقي دا اسمه كلام ؟

وصفوا لي الناس ما ألمحش عينيك..

 وان شفتك جاي ما اجريش حواليك

وان قلت الله …أو غمزت عين

علي لون الروچ أو طقمى الشيك

ما اصرُخش وألم الخلق عليك

وانا عاقلة وراكزة وكله تمام

بتقول نسهر ولـ وش الفجر ..

تحضنى بعينك أدفي وانام

..ونغنّى أغانى الحب إياه..

ونفوق علي غنوة شيخنا إمام

طب اعمل ايه في أم الضحكات

والبـّحُة اللي بتدبحها يا واد ؟

 بتاخدنى السبت ..ارجعها تلات

ما اعرفش يا( غجري )خدتنى لفين

طب لابسة وراجعة .. انا جاية منين؟

الله يهديك ..( طلّقنى وناااااااام )

بقي دا اسمه كلام

تضحك لي عينيك ..انسي الايام