( كله في الآخر هيرحل )
للشاعر جمال زكي عينر
لما تبقى وإنت حي
مش عارف إيه اللي جي
لما تجهل هل يا بكره ؟
إنت ميت ولا حي
يبقى امرك كله راجع
للي فوق العرش حي
يعني شيل عنك همومك
وإرمي عن قلبك حمولك
في إله هو اللي حارسك
مهما كان عرضك وطولك
إوعى تنسى يوم حسابك
او عقابك او ثوابك
إوعى تنسى ف يوم حقيقتك
ولا تتغر بشبابك
كله فاني كله زايل
اللي معدول واللي مايل
كل واحد له حسابه
كل واحد شيلته شايل
عيش سنة او عيش الوف
لف في الدنيا وطوف
راح تلاقي الكل راحل
كل من في الكون ضيوف
يبقى ليه نظلم في روحنا ؟
ليه نزود من جروحنا ؟
كله في الآخر هيرحل
مهما جينا ولا روحنا
