نصائح_مطبخيه لست البيت
– البانيه بيتتبل بمية بصل وملح وفلفل مش ببصل مبشور علشان تفل البصل بيغير الطعم خالص
– اللحمه المفرومه وانتي بتعصجيها متستعجليش ابدا المفروض بتاخد معاكي اقل حاجه تلت ساعه علشان تستوي وتاخدي منها احسن نكهه وطعم ولو اكتر يكون افضل
– البابا غنوج لما بنضيفله معلقتين زبادي مع الطحينه بيبقا بارد وميوجعش في اللسان
– السلطه البلدي لما بنضيفلها نص معلقه صغيره سكر وفص توم بتبقا وهمم
– الحواوشي البيتي لو حطيناله كرفس مفروم وكام ورقه نعناع بيبقا خطير
– المكرونه الصلصه لما بنحطلها ورقتين ريحان في الاخر بتبقا فظيعه
– المحشي لما نحطله حتة زبده بلدي في الاخر كدا قبل مانحشي علي الخلطه بتبقا ريحته تجنن
– السمك لما بيتحط في الفرن لازم يكون الفرن سخن جدااا من قبل علشان ميزفرش منك
١- الفراخ المشويه لما بيتحط في تتبيلتها معلقة صلصه ومعلقة بابريكا ونص معلقه ثغيره عسل بيبقا لونها حلو اووي
١- المكرونه البشاميل بتبقا مسلوقه تلات ارباع سوا علشان تكمل سوا في الفرن ومتعجنش منك
– الرز المعمر بنحط علي وشه قشطه بلدي او زبادي علشان يعمل وش حلو
– المهلبيه بنقلب كل المكونات ع البارد وهرفعها علي النار مع التقليب المستمر عمرها ما تكلكع منك ابدا
– العناب لما يتنقع الكركديه بيكون اطعم بكتيير من المغلي
– علشان الفراخ تاخد لون حلو ادهنى الفراخ بالصوص اللى نازل منها فى الصينية وشغلى شواية الفرن اخر خمس دقايق
