انواع واستخدامات المانجا
1 _ مانجة الأكل اللي هو هناكلها النهاردة وبكرة نشتري عويس وسكري
دول اكتر صنفين مميزين
العويس بتنفع تفضل في التلاجة لحد اسبوع مش بيجرالها حاجة
السكري نفسها قصير يومين تلاتة وتطرى وتفتح من جنابها هنا ممكن تخليها وتعمليها عصير او تفرزيها
2_ مانجة المطبخ
يعني اللي هندخلها المطبخ نعمل عصير وحلويات وسموزي وكده
الكيت والزبدية والفونس والصديقة والتيمور
بيكون فيها كتير طبعا طعمة ومسكرة الف هنا بس هى مانجات لحمها قوي وبتتحمل تقطيع وتزيين وكده زائد الاكل العادي طبعا
٣_ عاوزة ابعت لاصحابي او لقرايبي برة مصر
اختاري مانجة زبدية او عويس ماتكونش كاملة السوا يعني تكون ناشفة شوية بس مش حجر خلي بالك
الناشفة شوية دي تتلف في قماشة قطن او صوف وتترص مرتاحة فى شنطة هتوصل للناس بقيمتها ومش متفعصة ولا متبهدلة
٤_ عاوزة اخزن لرمضان او اخليها عندي وخلاص
كل المانجة تنفع تتخزن وتتفرز عادي حاولي بس وانتي بتخليها تقسميها أكياس وتخلي الكيس مفرود مش مكبب عشان يبقى سهل
واعملي رف او مكان مخصص للفاكهة في التلاجة لانها بتكرف من روايح الخضار والتوم ويبقى تعبك راح على الفاضي
٥_ اعرف المانجة الحلوة ازاي
ريحتها النفاذة امسكي ثمرة وشميها بالراحة هتلاقي ريحة مانجة قوية اللي مش مستوية بيكون ريحتها غصن شجر مقطوع ريحة مفيهاش عطر الفاكهة اتمنى اكون عرفت اوصل الفكرة
٦_ جالنا مانجة نية وقالولنا هتستوي
ايون هتستوي حطيها في طبق بلاستيك وغطيها بفوطة وسيبيها في حرارة الغرفة يومين تلاتة وريحتها هتقولك انا استويت
٧_ جالي مانجة ومعرفتش اخليها تستوي وهتبوظ مني ومززة قوي
خلليها ايوة المانجة المززةبتتخلل وبتطلع حلوة قوي
٨_ عاوزة اعمل عصير في الشياكة
اعملي عصير عادي خالص بس خليه تقيل شوية وعلى جنب قطعي ثمرتين كده مكعبات وسقطي المكعبات في قلب العصير وقدمي معاه شوكة وشاليموه
٩_ اوعي يجيلك مانجة خضرا ولسة مش مستوية وتحطيها في التلاجة هتدبل وتبوظ ومش هتستوي
المانجة النية ملهاش لا فريزر ولا تلاجة
١٠_ في مانجة عجيبة كده في السوبر ماركت وعلى العربيات في الشارع اسمها شيلوك مسحوبة كده وطويلة ياريت نقلل منها لان نسبة املاحها عالية جدا
١١_ النعوم بالنسبالى مش مانجة النعوم بحسها بطاطا عليها مانجا
صباحكم مانجة
