تعالى ياقلب أختك اسمعى الكلمتين دول
الناس بتتحاكى بغسيلك الأبيض
وحماتك بتتفشخر بصوانى الحلويات اللى مرات ابنها زوجه اروبه ولهلوبه في صنع الحلو الحادق والمحمر والمشمر
واخوكى مبياكلش الصيادية غير من ايديكى
واطفالك بيتباهو بالشوكليت كيك بتاع مامتهم
وبيتك بيبرق من النضافة واللمعان
وجاراتك بيحسدوكى على روايح التقليه والطبايخ اللى واصلة لاخر الشارع
لكن جوزك ظروفه ايه بتفتكريه انه فرحان قوى انه متجوز ستوتة
مفكرتيش فى مرة نظرته ليكى ايه ؟
اخر مرة عملتى قصة جديدة لشعرك امتى ؟
اخر مرة فكرتى تغيرى لونه او تسشوريه من سنة كام ؟
طب بعد توم التقليه المفحفح فيه برفان يخطف قلب جوزك ولاياعينى عليه ؟؟؟
لبسك فى البيت ستايله ايه ؟شبه امه ونينته ولا لبس بيدل على ان فيه انثى فى البيت ؟
تسريحتك لو بصيتى فيها هتلاقى عليها برفانات
ومكياجات تدخلى بيها السرور على زوجك ؟ولا الادراج خزين لكراسات العيال والكراكيب ؟
دولابك لو فتحتيه بتلاقى بادى وشورت وستانات وشيفونات وبيجامات صفرا وفوشيا والوان الطيف ؟
ولا جلابيات وعبايات والوانها كلها وقار وحشمة بنى واسود ورمادى وزيتى ؟
وايديكى اخبارها ايه مع الكلور والمنظفات والمطهرات مقشفة وناشفة وكانك عندك 80 سنة ؟؟؟؟ولا ايد انثى ناعمة بتهتم بترطيبها والعنايه بيها ؟؟؟؟
شعرك اخباره ايه متسرح وبيلمع وريحته حلوة كده ؟ولا بما انك ستوتة فانتى تخصص فى عمل الكعكة بجميع اشكالها؟
هتقولى حيلك عليا شوية اييييييييييييييه ياقلبي
هجيب منين كل ده علشان اهتم بنفسى مش كفاية مصاريف الاكل والعيال والمدارس والغاز والبنزين ؟
انتى تعرفى ان فى برفانات حلوة قوى ب 20أو 30 ج وفى برفانات تركيب كمان ارخص من كده هتفرق معاكى قوى ال 20 ج دى
انتى تعرفى اقلام الروج بتلاقيها بكام ب10ج بس يعنى مش صعبة خالص
على فكرة عايزة اقولك حاجة المشكلة مش فى الفلوس خالص المشكلة بس فى طريقة التفكير
يعنى مش هتفرق معاكى كتير لو وفرتى مبلغ كل شهر على قد امكانياتك وتظبطى نفسك بيهم .ممكن كمان تعملى جمعية بمبلغ زهيد تاخدى فى دورك مبلغ تشترى لنفسك بيه حاجات ودلعيها
هتفرق معاكى لو فتحتى دولاب المطبخ واخدتى شوية زيت زتون تعملى حمام كريم هتتعبى قوى لو اخدتيلك معلقة من كوباية الزبادى بتاعات الواد وحطيتى عليها معلقة عسل وعملتى بيه ماسك
واكيد مش هتاخد منك دقايق انك تقفى قدام المرايا قبل ماجوزك يجى تسرحى شعرك وتحطى كحلة وروج خفيف
وسهل قوى ترفعى عبايات وجلاليب الوقار وطلعى بيجاماتك الملونة الجميله حتى لو كانت قديمة فهى افضل بكتير من جلاليب البيت
“قومى ياعســـــــــل وبطلى كســــــــــل” ويلا على اوضتك وقولى انا انثى قبل كل شئ ورسولى عليه الصلاة والسلام أمرنى بالتزين لزوجى هتقولي احنا في رمضان هقولك أجهزي العيد علي وصول عايزين نروق علي نفسنا شوية
