الستات.. شاطرة  بقلم د. إسراء اسامه

الستات.. شاطرة

بقلم د. إسراء اسامه

حقيقة.. إن الست وقت الجد تقدر تبقا لوحدها بألف ألف ست

حالفني الحظ وقابلت نماذج اتحدت عقبات كتير اوي

وكل واحده فيهم عندها حلم وهدف

قابلت كريستينا ست جميله برغم أنها حققت حلم عيلتها أنها تبقا صيدلانية إلا أنها غيرت كاريرها وراحت لشغفها وهو الكروشيه .. ايه ازاي 😳 دكتوره تسيب الصيدلة وتروح لحرفة يدوية والاجابه اه.. هو ده اللي لاقت نفسها فيه

قابلت شيف عبير اللي قررت تاخد الريسك ومتبقاش شغاله في أماكن تهدر طاقتها واهتمت تعمل مطبخ خاص بيها

وتشيل لوحدها توريد وجبات لمصانع وشركات وكمان وجبات اطعام ولوحدها باجمل طعم وخامه

ست جدعه بجد

قابلت اسماء اللي برغم دراستها للغات الشرقية إلا أنها عافرت لحد ما عملت شغلها الخاص yummy cakes

وبقت اشطر شيف حلويات تعمل كاندي وكل انواع كيك عجينة السكر وفعلا هي فنانه اكتر من أنها شيف

نورهان بنوته لسه في بداية حياتها.. من صغرها ليها هوايات كتير بين الفن والرسم والرياضة واشتغلت على نفسها لحد ما بقت مدربة حرف يدوية وخصوصا الريزن مضيعتش هواياتها لا استغلتها و طورتها..

مس رحاب معلمة نشاط صناعي .. دورها ناحية بنتها هو الام والاب بعد وفاة زوجها ولأنها معلمة نشاط خلاها مش زي باقي المدرسين اه.. بس هي أستاذه في إعادة التدوير وزي ما بنقول في مصر ( بتعمل م الفسيخ شربات) اول ما تشوف حاجه انت هترميها تقولش في لمبه بتنور في مخها 😂 وفي ساعتها تعيد تدويرها..

الستات الشاطرة دول اتفقوا يدعموا بعض اتفقوا يكونوا فريق واحد يطمنوا على بعض يدعموا بعض يعملوا تسويق لشغل بعض.. ومعاهم مسوقه وجرافيك ديزاينر والمذيعه.. اتكاتفوا عشان يعدوا بتحدياتهم ويوصلوا للي هما عايزينه

دي قصص بسيطة ومختصره لان ورا كل قصة حاجات كتير

لسه في الأم اللي ربنا رزقها بطفل من ذوي الهمم وصممت تخليه بطل بعون الله ليها

في الارمله والمطلقة اللي اتحدت نظرة المجتمع وأصرت تنجح

في وفي ..

صدق اللي قال عليكم ألطف الكائنات

اوعي تتهزي .. قومي وقوي همتك

اللبن مسكوب؟ وماله… نشرب مايه بسكر

بس اوعي تبطلي تعافري.. اوعي تنهزمي

انت ست ؟ تبقي شاطرة

في دايما ألف ألف دليل إن الستات … شاطرة

د.إسراء اسامه

مذكرات امرأة قوية