ازاي تحط كل انسان في حياتك في خانة مناسبه
بقلم.. د / إسراء اسامه
قالتلي ازاي افرق أن اصحابي دول بيحبوني ولا لا
– الشخص اللي بيحبك هيتفقد حالك
كلت شربت معاك فلوس عيان اوصلك لدكتور
هتبقا حاسس بدفا وونس كده وعارف انك مش متساب تصارع امواج الدنيا لوحدك
عشان كده الصداقه درجات
في حد ممكن يبقا محظوظ يلقا خليل روحه وفي حد هيبقا كل اللي حواليه لمة صحاب يغيبوا في الدنيا وفجأة يسألوا وبعدين يغيبوا تاني مع حفظ مكانتكم في قلوب بعض
– الشخص اللي بيحبك هيفضل مدقق في أفعالك معاه
كل حاجه صغننه اد كده 🤏 منك هيعملك عليها احتفال
هيبقا مقدر الدقيقه اللي بتاخدها من وقتك تكلمه
هيبقا مقدر لجوءك ليه وجريك عليه اول واحد تحكيله همك
كل فعل منك هتحسه انك بتكتب رصيد شيكات
مش بتصب حبك في قلب مخروم مهما عملت ملكش عنده تقدير
– الشخص اللي بيحبك بيحب عتابك ويحول لحظات عتابك ليه للحظات جميله لانه هيشتري خاطرك
هيضمك ويقولك طب نورني عملت ايه غلط ونصلحه ازاي وايه اللي يرضيك
اللي يقلب عليك الترابيزه.. اللي يقولك اهو انا كده
اللي يستهتر بزعلك يبقا انت مش فارق معاه
اللي بيحبك لحظة زعلك عنده مصيبه
الصاحب والحبيب اللي يحب يتشقلب عشان يبعد الأذى والزعل عن قلب حبايبه مش يردم كوم تراب على قلبه وهو بينزف
فهو مش صاحب ولا حبيب اوي يعني
وقلل شوية سيل عواطفك تجاهه
متحكموش ع الناس أنها بتحبكم ولا لا الا بعد المواقف
لان حبك لشخص بيخليك تعمل حاجات فوق طاقتك
عشان ترضيه
وقت ما بتلاقي أن الحاجات دي مش مردوده ولا متقدره
بتتوجع اوي اوي اوي
وتفقد ثقتك في كل العالم
رغم انت اللي اتسرعت من الاول وحركت الناس من خاناتهم
قبل ما يسجلوا هما أسماءهم في كل خانه بمواقفهم
#صديقك #حديث_مع_طلابي
#د_إسراءاسامه
#مذكرات_امراة_قوية
