نصائح مطبخية

نصائح مطبخية

١ كلنا عندنا مشكلة ان الخضرة و

البقدونس بيدبلوا و يبوظوا بسرعة في التلاجة

الحل

هو انك أول ما تيجي الخضرة .. اغسليها و نشفيها ,, و هاتى علبة متوسطة من علب التلاجة البلاستيك الي عندك .. و حطي في الارضية بتاعها ورق كلينيكس او ورق مناديل مطبخ السميكة دي ,, و حطي بعدها الخضرة او البقدونس .. و حطي بعد ما تخلصي وقبل ما تقفلى العلبه ورق فوق تاني غطي بيه باقي البقدونس .. كده هيعيش معاكي فترة اطول و يحتفظ بخضارة و ميصفرش ولا يبوظ

2  لو جيتي تسلقى بيض .. خرشوف .. كرنب .. اي حاجة من الحاجات الي بتطفي شكل الحلة بعد السلق دي .. وعاوزة الحلة ترجع زي ما كانت

حطي فيها ماية و حطيها عالنار .. وحطي في الماية قشور لمون .. وبعد ما تاخد غلوتين تلاتة .. اغسليها عادي هتلاقيها رجعت جديدة زي ما كانت

3 لو عندك مكان معين متأكدة ان مصدر دخول وخروج النمل و عاوزة تتخلصي منه فعلا

هتروحي تجيبي ورقة جرنال او ورقة كراسة او اي ورقة .. و تروحي عالبوتجاز وتحرقيها ,, و بعدين تلمي الرماد الي اتحرق ده برفق .. و روحي على المكان الي فيه تجمع النمل .. و حطي الرماد ده .. هتلاقي النمل اختفى تماما

4 و قلقانه من الخضروات و الفواكة و انتي بتغسليها انها برضه مش نظيفة

اتعودي دايما تجيبي الحلة او الطبق الي هتغسلي فيه الفاكهة و الخظار و حطي معلقة واحدة كبيرة خل في الماية الي هتنضفى بيها الخضار و الفاكهة .. الخل هيقتل اي جراثيم ممكن متموتش بالغسيل العادي

5 لو عندك بيض بقاله مده في التلاجة و عاوزة تستعمليه و عندك شك ان كان بايظ ولا لاء

هتجيبي البيضة و تجيبي كوباية ماية ساقعة مدوبة فيها معلقة ملح .. و حطي البيضة في الكوباية .. لو طفت على السطح .. تبقي باظت .. لو وقعت و سقطت تحت تبقي بنت حلال و اصيلة و لسة كويسة

6لو عاوزة تسلقى بيض و وانتي بتحطيها في الحلة اتشرخت شرخ بسيط

حطي في ماية السلق معلقة خل او شوية ملح في ماية السلق .. و بكدة هتستوي جوا قشرتها ومش هتبوظ ولا حاجة

7 لو بتسلقى بقوليات .. زي الفاصوليا البيضا و اللوبيا

متحطيش الملح إلا في الاخر خالص بعد ما الاكل يستوي .. لان لما بتحطي الملح .. مدة السلق بتطول اوووووي بعكس لما متحطيش الملح و تستني لما تستوي.