دا اخوك الصغير اديله لعبتك
متابعه.. شيماء العراقي
مينفعش تقوله لأ سيبله حاجتك
دا زميلك في الفصل لازم تساعده و تسلفه ادواتك
مشكلة كبيرة كبرنا عليها وهي اننا لما حد بيقولنا لأ لما نطلب شئ من ملكيته الخاصة بنتخض كدة و كإنه غلط فينا و شتمنا بالأب و الأم
يعني ايه يبقي اخويا و يقولي لأ عمري مهعتبره اخ ليا تاني
يعني ايه صاحبي ميرضاش يجي معايا مشوار في غيره الف
لأ يا جماعة لأ والف لأ الإنسان مش مطلوب منه (دايما) انه يقول اوك و حاضر و طيب علي كل طلب يتطلب منه، دا مش عدل ولا ربنا يرضي بكدة
والله اعلم كل مرة بنجبره يوافق علي حاجة بيكون نفسه سامحة و لا بنيجي علي نفسه و نكسرها و نضعف شخصيته عشان مصالحنا او مصالح حد تاني
و محدش عارف دا بيكون اثره ازاي علي النفسية، بيولد شخص ضعيف، مجبر، محبط، حاسس بالكره ولا بالغصب ولا بالقهر و كاتم جواه عشان ميزعلش حد
و المشكلة اصلا ان الناس دايما بتاخد صف اللي زعل، قصدي اللي ملوش حق يزعل لإن هو اللي بيعرف يعمل الفيلم و يمثل فيه دور الضحية المجروحة من ظلم كبير وهو ان اتقاله لأ
فعلا !!
هو الانسان ملوش حق يعترض مرة او اتنين لازم علي كله يقول موافقة
دا انهي عيشة و انهي حياه دي بقي !! طب تعالي اسمع
عن سهل بن سعد -رضي الله عنه-: أن رسولَ اللهِ -صلى الله عليه وسلم- أُتِيَ بشرابٍ، فَشَرِبَ منهُ وعن يميِنِه غُلامٌ، وعن يسارِه الأشياخُ، فقالَ للغُلامِ: “أَتَأذَنُ لِي أنْ أُعْطِيَ هؤلاء؟”، فقالَ الغلامُ: لا واللهِ يا رسولَ اللهِ، لا أُوثِرُ بنَصِيبي منك أحداً. فَتَلَّهُ رسولُ اللهِ -صلى الله عليه وسلم- في يدِه.
انتوا فاهمين يعني ايه الرسول صلي الله عليه و سلم اشرف الخلق يستأذن غلام، يعني طفل اصغر منه و اصغر من شيوخ
شايفين قد ايه مكسرش بخاطر الطفل اللي احنا عادي بنهمشه عشان دا عيل، عادي خد منه مش هيحس
او دا اخوك ان شااللة انت ما لعبت المهم هو
الطفل من سن ٤ ل ٦ سنين بيكون اناني شوية و عايز حاجته ليه و دي حاجة مش عيب ولا حرام ولا تجعل منه شخص اناني ولا غلاوي ولا كل الكلام دا
و بالتالي عشان نعلمه العطاء محتاجين
١. نستأذنه لما نحب نتبرع بحاجته او نديها لحد حتي لو اخوه هيلعب بلعبته و يرجعها وهو مش موافق خلاص بنشوف بديل للصغير و نحترم ملكيته عشان هو كمان يحترم ملكية غيره
٢. نعلمه معني العطاء، بص انا كأمك هطلع انهاردة فستان او شوز و اتبرع بيه ايه رأيك تحب تساعد انت كمان بحاجة من عندك و نسيبه يختار
٣. نعلمه الكرم، خد الشوكولاتة اعزم علي جدو او عمو عشان ياكل و بنبسط معانا
٤. نعلمه معني السلف، بص لما بناخد حاجة من حد بغرض اننا نستخدمها لازم يكون الشخص موافق مينفعش من وراه ناخدها، ولازم نحافظ عليها و نرجعها زي ما اخدناها بالظبط عشان ميزعلش
٥. نعلمه الملكية، دي لعبتك و دي لعبة اخوك، لو انت عايز تلعب بيها شوية روح استأذنه او استلفها منه شوية لو وافق اوك لو موافقش اسأله طب ينفع اخدها منك امتي
استني رايحة فين، عرفي الام اللي فاكرة ابنها مفتري و جاحد و اناني مبيحبش الا نفسه خليها تعامله بشكل افضل عشان يتعلم المعاني نفسها مش يتعلم ان الحب انه يقول اه وخلاص
معا لصحة افضل لأطفالنا
