ابن بارم ديله مقولة بنقولها دايما أتعرف على حكايتها
هو فاكر نفسه مين؟! “ابن بارم ديله”!!
فيه قصة متداولة إن أصل المقولة بيرجع لشخصية مرموقة كانت متواجدة ف مصر زمان اسمها “البارون ديلون” وإللي اتحرّف اسمه مع الوقت لـ “بارم ديله”. لكن القصة طلعت مش صحيحة لإن مفيش أي توثيق لشخصية بالاسم ده كان ليها تأثير على الثقافة المصرية، والتاتش المصري – وعلى غير العادة – طلع المرة دي براءة لإن فيه حد فعلا اتعرف بلقب “ابن بارم ديله”.
في كتابه “عجائب الآثار في التراجم والأخبار”، ذكر المؤرخ المصري عبد الرحمن الجبرتي إن “بارم ديله” كان لقب واحد من أكبر أمراء الدولة العثمانية اسمه “سليمان بك الأرمني” إللي كان معروف بسليمان بك “بارم ذيله”. تولى “سليمان بك” رتبة “الصنجكية” إللي بتعادل دلوقتي رتبة اللواء سنة 1690م، وبعد وفاته جه ابنه “عثمان جلبي” وبقى خليفة ليه ف منصبه. “عثمان” كان فارس شجاع وذكي محب لمطالعة الكتب وكان له دور مهم في الصراعات العسكرية في الوقت ده.. وعشان كده أصبح “عثمان بن بارم ذيله” مضرب المثل في الوجاهة والشجاعة والغنى والثقافة؛ ومن وقتها أي حد بيحاول يتعالى أو يتفاخر بدون وجه حق بقى يتقال عليه: انت فاكر نفسك “ابن بارم ديله”!!
