طريقه عمل كوسه باللحمه المفرومه والباشميل ،صنيه بطاطس باللحمه فى الفرن ، قرنبيط بالفيجتار

مقادير الكوسه باللحمه المفرومه والباشميل :-

☆1/2كيلو لحمه مفرومه
☆1/2كيلو كوسه متقطعه حلقات
☆بصله متوسطه الحجم مفرومه
☆جبنه موتزريلا
☆أو جبنه شيدر
☆ملح وفلفل أسود
☆زعتر وجوزه الطيب
☆ورشه قرفه

للباشميل :-

☆1/2كوب دقيق
☆1/2كوب زبده
☆2كوب ونص لبن
☆ملح وفلفل
☆مكعب مرقه دجاج

طريقه التحضير :-

هنشوح البصل مع الزبده على النار لغايه تدبل وبعدين هننزل باللحمه المفرومه ونقلب لغايه اللحمه ما لونها يتغير ، هنحط الملح والفلفل الأسود ورشه جوزه الطيب ورشه قرفه وزعتر ناشف، ونقلبهم مع بعض كويس وبعدين هنحط معلقه صلصه كبيره ونقلبها مع اللحمه بتدى لون وطعم جميل للحمه المفرومه، هنوطى النار وهنسيبها لغايه ما تستوى والميه بتاعتها تنشف، ممكن تضيفى القليل من الماء لو حسيتى أنها لسه مستوتش كويس، هنرفعها من على النار ونسيبها تبرد.
هنقطع الكوسه حلقات يكون سمكها تخين شويه عشان ما تتهريش، وبعدين هنحضر الباشميل، هنسيح الزبده على النار وبعدين هنحط الدقيق ونقلب لغاية الدقيق مايتشرب كل كميه الزبده هننزل باللبن ويفضل يكون ساقع عشان الباشميل ما يعملش كتل، هننزل باللبن تدريجيا مع الاستمرار فى التقليب لغايه ما قوامه يثقل ، هنحط مكعب مرقه الدجاج مع الاستمرار فى التقليب  .
ممكن نضيف للباشميل مكعبين جبنه كيرى أو أى نوع جبن كريمى ونقلبه مع الباشميل هيخلى طعم الباشميل أحلى، لو مش حابه تضفيه أو مش متوفر عندك مش مشكله، هنرفع الباشميل من على النار وهنحط عليه الملح والفلفل الأسود ونقلبهم فى الباشميل كويس جدا، هنجيب صنيه ونرص فيها راق كوسه وبعدين راق لحمه مفرومه وبعدين راق كوسه وبعدين هنحط الباشميل وعليه رشه جبنه موتزريلا وبالهنا والشفاااا.

☆طريقه عمل صنيه بطاطس باللحمه فى الفرن :-

صنيه بطاطس باللحمه

مقادير صنيه البطاطس باللحمه :-

☆1/2 كيلو لحمه مسلوقه نص سلقه
☆4 بطاطس كبار الحجم متقطعين حلقات
☆4 حبات جزر متقطعين حلقات
☆2 بصلة متوسطه الحجم متقطعه حلقات
☆ثوم مفروم
☆عصير طماطم
☆معلقه صلصه كبيره
☆مرق دجاج
☆ملح وفلفل أسود
☆بهارات
☆حبهان وورق لورا
☆زبده أو سمنه

طريقه التحضير :-

فى وعاء كبير على النار هنسيح الزبده وبعدين هننزل بعصير الطماطم وصلصه الطماطم والملح والفلفل الاسود والبهارات والحبهان وورق الورى ونسيبها لغايه ما تتسبك،  هنجيب صنيه فرن ونرص حلقات البطاطس وحلقات الجزر وحلقات البصل وعليهم الثوم المفروم، بعدين هنحط عليهم بصوص الطماطم وقطع اللحمه المسلوقه، ونسيبهم على النار لغايه ما تغلى، هنرفعها من على النار وندخلها الفرن على درجه حراره متوسطه لمده ساعه كامله،أو لغايه ما تستوى تقدم مع الارز الابيض والسلطه الخضراء وبالهنا والشفاااا.

☆طريقه عمل القرنبيط المقرمش بالفيجيتار:-

قرنبيط بالفيجيتار

مقادير القرنبيط بالفيجيتار:-

☆4بيضات
☆2كوب بقسماط مطحون
☆ملح
☆وكمون
☆1/4كوب دقيق
☆معلقه بيكنج بودر صغيره
☆خضره (شبت وبقدونس وكزبره خضراء مفرومين )
☆ربع كوب لبن
☆3فص ثوم كبار مفرومين

طريقه التحضير :-

يقطع القرنبيط إلى زهرات صغيره ثم يغسل بالماء ويصفى ويسلق في ماء به ملح وكمون، ثم نرفعه من الماء ونصفيه جيدا من الماء، فى وعاء أخر هنخلط البيض مع الدقيق والخضره والملح والفلفل الأسود والكمون واللبن والبيكنج بودر والثوم المفروم ، نضع القرنبيط فى الخليط ثم نضعه فى البقسماط  عشان يقرمش معاكى، هنحمر القرنبيط فى زيت غزير وساخن ،حتى يأخذ اللون الدهبى، ننتشله من الزيت ونضعه على مناديل ورقيه لتتشرب الزيت وبالهنا والشفا.
هقولك على فكره  تانى حلو ه وجميله ممكن تعملى بيها القرنبيط وهيطلع تحفه واولادك هيحبوه ممكن تحطى القرنبيط بعد ماتسلوقيه فى البيض ثم فى خليط الفيجيتار والدقيق وبعدين هتحمريه في الزيت وبالهنا والشفاااا.