ابن شقيقة إيمان الطوخي يكشف حقيقة الابنة المجهولة: خالتى لا اتجوزت ولا خلفت

 ابن شقيقة إيمان الطوخي يكشف حقيقة الابنة المجهولة: خالتى لا اتجوزت ولا خلفت

متابعة غاده المصري

 من 28 سنة، اختفت الفنانة إيمان الطوخي عن الساحة الفنية، وفضلت الصمت والعزلة.. لكن مؤخرًا، طلع المطرب أحمد محسن – ابن شقيقتها – وفك كل علامات الاستفهام حوالين مكانها وحياتها الحالية.

 وعن شائعة وجود بنت ليها على مواقع التواصل، أحمد حسمها وقال:“البنت اللي بتدّعي إنها بنتها، دي لا تعرفنا ولا نعرفها.. وخالتي أصلاً ما اتجوزتش ولا خلفت”.

 أحمد قال بوضوح: “خالتي ما سافرتش أمريكا ولا هاجرت زي ما بيتقال، هي عايشة في مصر من زمان وما سابتش البلد خالص”.

 وأوضح إن إيمان كانت عايشة مع والدتها لحد ما توفت من 8 سنين، ومن بعدها وهي شبه منعزلة، لا بتخرج من بيتها إلا نادرًا جدًا، ولا بتستخدم موبايل حديث، ولا حتى بتدخل على السوشيال ميديا.. موبايلها قديم بزراير.

 وأضاف: “إحنا أسرتها الحقيقية.. شقيقتها وأولاد شقيقتها، هما بس اللي بيزوروها”، ورغم العزلة، إلا إن إيمان لسه بتحب الفن.. وآخر حاجة شافتها على التليفزيون كانت مسلسل “لام شمسية”، وأعجبت بيه جدًا، ووصفت فريق العمل إنه عمل حاجة مميزة ومختلفة