ماذا لو ؟!.. الشاعر وحيد علي الجمال
ماذا لو عاد
قولوا لو
وقولوا عَو
و إعملوا م الحزن جو
و إعلنوا إن المشاعر
أصلها كدب و مهازل
و إنه كان إحساسه سَو
كان مخادع كان ملاوع
كان بيعمل م المواجع
ألف حجه و ألف مانع
رغم كدبه كان لكدبه
طعم تاني و أحلى جو
مرة راضي بقلب شادي
مرة ساخط ع الحدادي
رغم طبعه لسه نادي
يرقي صبره
و ينعي حظه
جوه نفسه فجأة سافر
ليل عيون الرمش صاحي
من شموس الحب ضاحي
كان عامل من نفسه قاضي
كان عصامي و كان محامي
لو رياح الشدة قامت
و استدامت
تلقى منه 1000 شامت
كان يسبّح بالمحامد
لو دموعه منه هانت
ينصبولوا ف المشانق
أصله واد مايع و خايب
و النكد مطبوخ و بايت
و الحقايق عاوزه فايق
يبلع القسوة في ثواني
و تلاقيه يرسم أماني
عاد لأنه لسه حافظ للوداد
مهما داسوا فوق وجيعته
و قالوا مات
عاد لأنِك حته منه ساكنه دمه
حتي لو سمعك بتدعي بالهلاك
ولاّ عمره ماكنش عاد
إنتى فارقه عنده جداً
حد غيرك مش هيسكن
غصب عنه و بالمسكن
مهما قلبك فوقه عاد
إنتى فاكره القلب الاهبل
حاجه منها الحب يخجل
دي الطيابه لسه فاتح
فيها باب
لو طفِيتي الشمع كله
و اكتفىَ قلبك بسره
هغزل العشق بمشاعره
و ارسمك جنه في كتاب
نيتي صفتها فيكى
مش هفارق يوم عينيكى
مش هبيع أبدا هواكى
جرحي واخد من ملامحي
حتى لو رافضه تسامحي
حب عمري ليكي إنتى
مش لغيرك
لو تبيعي يشتريكي
