لما يرجع … الشاعرة جيهان عبد العال
لما يرجع والدموع ماليه عينيه
واما يجي لحد عندي
والغرام باين عليه
واما احس بشوقه تاني
وإني أصلا فارقه ليه
وأن قلبه وكل نبضه ماتوا فعلا
يوم ما ضعت من إيديه
وان كل الكون بحاله
وف غيابي ضاق عليه
يومها بس وفي ساعتها
راح أبص وفي عنيه
وهقوله كلمه واحده
تفتكرني أعود أليك؟
وأرمي روحي جوا حضنك؟
وأبقي مشتاقه لعنيك؟
وأني عوزه أبقي جنبك؟
وأني فعلا بشتريك؟
طب سؤال ياحبي ليك
انت قلبك ليه أناني؟
ليه ما بيفكرش الا فيك؟
ليه عاوزني اعود لغدرك؟
ليه عاوزني احس بيك؟
وابقي حاجه من حاجاتك
وارضي ذلي بين إيديك؟
روح يالله بمليون سلامه
وأقفل كل باب وراك
قلبي رافضك من حياته
مستحيل يعود إليك
