طفلة بريئة … الشاعرة رباب صابر
طفلة بريئة
غاوية تتشعبط في كتفك
وفــ ايديك
غاوية نظرة من عينيك
فيها متاهات الحياة
عايزة لما تشب ليك
تبقى طايلة المنتهى
سايبة كف الليل ومسكت
كف إيد الأمنيات
واحدة كانت لو تسيبها
تحكي عنك بالساعات
ماسكة إيدك وفــ إيديها
ساحبة عُمر من الحنين
لو تغمض جفن عينها
كات تسافر فيك سنين
لو تخاف م الدنيا لحظة
تجرى تتخبى فــ مسامك
لو توافق تمتلكها
راح تسيب الكون عشانك
طفلة يمكن بطفولتها
حلت المر فــ ساعاتك
انثى جايز بأنوثتها
تسرق الجى فـ حياتك
عاقلة بجنانها وحنانها
لو تقول مجنونة بيك
لما بتقولك بحبك
بتبقى وهبت روحها ليك
